Ministri izraelit i Mbrojtjes, Israel Katz, ka paralajmëruar se Ushtria e Mbrojtjes së Izraelit (IDF) është gati të intensifikojë operacionet ushtarake nëse Hamasi nuk pranon të lirojë pengjet e mbajtura në Rripin e Gazës, përcjell YNetNews.
Duke folur gjatë ceremonisë shtetërore përkujtimore për ushtarët e rënë në Luftën e Yom Kipurit në varrezat e Malit Herzl, Katz deklaroi:
“Presim zbatimin e fazës së parë së shpejti dhe lirimin e menjëhershëm të të gjitha pengjeve. IDF ndodhet në zemër të qytetit të Gazës dhe është e përgatitur për çdo mundësi. Nëse Hamasi refuzon të lirojë pengjet, IDF do të intensifikojë sërish zjarrin deri në shkatërrimin e Hamasit dhe lirimin e plotë të pengjeve.”
Deklarata e ministrit vjen në një moment kyç të konfliktit, ku presioni ndërkombëtar për një zgjidhje dhe lirimin e pengjeve është në rritje. Ndërkohë, forcat izraelite vazhdojnë të jenë të pranishme në zona strategjike brenda qytetit të Gazës.
