Dy agjentë të inteligjencës spanjolle u arrestuan për zbulimin e informacionit sekret në favor të SHBA-së, raportoi të hënën e përditshmja spanjolle El Pais.
Ministrja e Mbrojtjes Margarita Robles konfirmoi se një gjykatës po heton çështjen dhe se Qendra Kombëtare e Inteligjencës e Spanjës (CNI) paraqiti ankesën ligjore.
Duke folur nga një bazë ushtarake në Lituani, ajo tha se nuk mund të jepte hollësi pasi procedurat ligjore janë të fshehta.
Më herët të hënën, e përditshmja spanjolle El Confidencial zbuloi historinë, duke thënë se agjentë të ndryshëm ishin nën hetim dhe se rrjedhjet hapën një krizë diplomatike midis Madridit dhe Uashingtonit.
Qeveria spanjolle ishte e zemëruar që një aleat si SHBA-ja kishte depërtuar në agjencinë e inteligjencës spanjolle, thanë burimet për El Confidencial. Madje, Madridi është përpjekur ta mbajë të heshtur, raporton e përditshmja.
Skandali i fundit i madh i informacionit në agjenci ndodhi në vitin 2007 kur Roberto Florez, një spiun, u arrestua për shitjen e informacionit në Rusi në lidhje me CNI, si dhe zbulimin e identiteteve sekrete të dhjetëra agjentëve nga Spanja dhe vende të tjera. Florez u dënua me 12 vjet burg në vitin 2010.
VINI RE: Ky material është pronësi intelektuale e AA
