Një 30-vjeçar është arrestuar mëngjesin e sotëm në portin e Durrësit, pasi ka tentuar të kalojë në mënyrë të paligjshme mbi 100 mijë paund.
Policia sqaron se si rezultat i operacionit policor të koduar “Fluksi 3”, u kap në flagrancë dhe u arrestua Diafet Palushi banues në Sukth. Ai vinte nga Anglia dhe kishte fshehur në çantën e dorës, 100 460 paund, me qëllim futjen e tyre në Shqipëri, pa i deklaruar sipas ligjeve në fuqi.
Njoftimi i policisë:
Finalizohet operacioni policor i koduar “Fluksi 3”, i treti gjatë kësaj jave, për goditjen e tentativave për të futur para të padeklaruara, në vendit tonë, të cilat dyshohet se rrjedhin nga veprimtari kriminale.
Sekuestrohen 100 460 paund. Arrestohet 30-vjeçari, Diafet Palushi, që vinte nga Anglia dhe tentonte t’i fuste paratë në Shqipëri, me çantë
Gjatë kësaj jave, në këtë pkk u sekuestruan 204 230 euro të tjera që tentoheshin të futeshin në vendin tonë, ilegalisht, me 2 autobusë.
Shërbimet e Policisë Kufitare të portit të Durrësit, në bashkëpunim me autoritetet doganore, si rezultat i zbatimit të masave shtesë të ndërmarra gjatë sezonit turistik 2023, për të rritur parametrat e sigurisë në këtë pkk, për t’iu ofruar qytetarëve, shërbim cilësor, etik dhe të shpejtë, si dhe për të parandaluar dhe për të goditur krimet kufitare, kanë finalizuar një tjetër operacion për goditjen e tentativave për të futur para në vendit tonë, pa i deklaruar.
