Nga Klodian Tomorri
Teksa hetimet e SPAK po nxjerrin gjithmonë e më shumë në dritë kënetën e madhe korruptive të inceneratorëve, kurioziteti i madh publik është se kush do të jetë dardhaxhiu i radhës.
Me Lefter Kokën dhe Alqi Bllakon në burg, Tigrin e arratisur në ekzil dhe hijen e prangave që vërtiten mbi Bashkinë e Tiranës, por jo vetëm, maxhoranca politike që do të rilindte Shqipërinë tashmë është shndërruar në kontigjentin më të madh të drejtësisë penale në Shqipëri. Dhe ky kontigjent vetëm rritet.
Hapja e pusetës së Tiranës do të zgjerojë edhe më shumë listën e atyre që kanë ngrënë dardha pas kurrizit të udhëheqësit vizionar por naiv, që firmoste fap fap fap në mirëbesim çfarë i çonin përpara. Dhe sa më shumë rritet numri i bashkëpunëtorëve të tij që bien në rrjetën e SPAK, aq më shumë kryeministri është i detyruar të ndryshojë qëndrimet publike për këtë çështje.
Tashmë inceneratorët nuk janë më vepra të krenarisë, por një punë e bërë në mirëbesim, të cilën ata poshtë tij e kanë shfrytëzuar për të nxjerrë përfitime të paligjshme personale. Me pak fjalë, varianti i përgjegjësisë individuale është mburoja e fundit që i ka mbetur Edi Ramës për të mbajtur larg pisllëkun e madh të inceneratorëve nga zyra e Kryeministrit.
Por mbatja larg e përgjegjësisë penale nuk e shpëton dot kryeministrin nga një përgjegjësi tjetër, që për një udhëheqës është ndoshta edhe më e rëndë. Politikisht dhe moralisht Edi Rama është përgjegjësi kryesor i aferës së inceneratorëve. Jo vetëm sepse u shiti shqiptarëve bandën më të madhe të hajdutëve në historinë e Shqipërisë si ekipin që do të rilindte Kombin. As sepse u tregua i paaftë për të kuptuar se të gjithë këta po vidhnin pas krahëve të tij. Por për diçka shumë të rëndë se kaq. Shkatërrimin e antikorpeve të shtetit.
Tunfimi i zyrtarëve për të vjedhur nuk është një sëmundje vetëm shqiptare. Me këto gjëra bëhen edhe filma nëpër botë- do të thoshte me të drejtë Elisa. Por një shtet ka antitrupa dhe mekanizma, të cilët reagojnë për të parandaluar dhe zbuluar korrupsionin.
Vetë kryeministri ka nën varësinë e tij direkte një drejtori të madhe antikorrupsion. Institucionet qëndrore kanë departamente të tëra auditimi, që paguhen pikërisht për të mos lejuar vjedhjen e parasë publike apo për të zbuluar abuzimet e atyre që hanë dardha fshehurazi. Në rastin e aferës së inceneratorëve puna ishte edhe më e lehtë që këta mekanizma të vepronin për shkak se faktet po dilnin në dritë nga të gjitha anët.
Por asnjëri prej tyre nuk e bëri. Sepse qeveria që kryeson kryeministri ka asgjësuar të gjithë antitrupat e shtetit. Njësoj si një virus malinj. Ky është dëmi më i madh që na shpërfaqi afera e inceneratorëve. Dhe kjo nuk është përgjegjësi e atyre që hëngrën dardhat. Kjo ka vetëm një përgjegjës kryesor. Arkitektin e virusit malware Rilindje.
VINI RE: Artikulli është pronë intelektuale e Oligarkia.al
