Rusia po shkatërron veten me luftën e saj kundër Ukrainës, sipas ministres së Jashtme gjermane.
“Me këtë luftë brutale agresioni, Putini po shkatërron vendin e vet”, u tha Annalena Baerbock gazetarëve gjatë një takimi të ministrave të jashtëm të BE-së në Luksemburg të hënën.
Zhvillimet e fundjavës në Rusi kishin të bënin me një ‘luftë të brendshme për pushtet’ dhe Gjermania dhe BE-ja ‘nuk donin të ndërhynin’, tha Baerbock.
E gjithë kjo ishte ‘vetëm një akt në këtë spektakël rus’, shtoi ajo.
Sipas Baerbock, ‘shqetësimi i vetëm i Evropës është të ndihmojë Ukrainën të jetojë sërish në paqe dhe liri’.
Në takimin në Luksemburg, ministrat e Jashtëm të BE-së vendosën të rrisin fondet për furnizimin me armë dhe pajisje për Ukrainën dhe vendet e tjera partnere me 3.5 miliardë euro të tjera.
Sipas një zëdhënëseje të BE-së, ky është një sinjal i qartë politik i angazhimit të vazhdueshëm të bllokut për ndihmën ushtarake ndaj Ukrainës dhe partnerëve të tjerë.
