Kisha Katolike po heton akuzat për një ‘festë seksi’ që u zhvillua në Katedralen e Shën Marisë në Neëcastle ndërsa pjesa tjetër e Mbretërisë së Bashkuar ishte nën rregulla të rrepta bllokimi, raportoi Sunday Times. Hetimi është pjesë e një hetimi më të gjerë të Vatikanit në dioqezë, që përfshin raste të shumta të abuzimit seksual.
Në një letër të cituar nga media të dielën, Kryepeshkopi i Liverpool-it shkroi se atij i ishte kërkuar nga këshilltarët e Papës që të përpilonte ‘një raport të thelluar’ mbi ngjarjet që çuan në dorëheqjen e Robert Byrne si peshkop i Hexhamit dhe Newcastle në dhjetor.
Byrne u bë peshkop në vitin 2019 dhe menjëherë emëroi Atin Michael McCoy si Dekan të Katedrales së Shën Marisë në Newcastle.
Kur Mbretëria e Bashkuar u vendos nën rregulla të rrepta bllokimi vitin e ardhshëm, McCoy dyshohet se iu afrua disa famullitarëve dhe u kërkoi atyre të merrnin pjesë në ‘një festë’ në katedrale, tha një burim për Times. Kjo ngjarje u përshkrua nga burimi si ‘një festë seksuale që po zhvillohej në dhomat e banimit të priftërinjve pranë katedrales së Newcastle’, citon The Guardian, Sunday Times.
Nuk ka asnjë provë që Byrne dinte ose kishte marrë pjesë në festën e supozuar. McCoy kreu vetëvrasje në vitin 2021 pasi policia hapi një hetim mbi akuzat historike të abuzimit seksual të fëmijëve që përfshinte klerikun. Ai nuk ishte akuzuar për një vepër penale në kohën e vdekjes së tij.
