Gjermania po përballet me një rrjedhë të re refugjatësh të nxitur nga konflikti në Ukrainë dhe vendi nuk po bën asgjë për t’u përgatitur për të, paralajmëroi të shtunën Manfred Weber, presidenti i Partisë Popullore Evropiane (EPP).
Duke folur për gazetën ‘Welt am Sonntag’, Weber, i cili është gjithashtu kreu i Grupit PPE në Parlamentin Evropian, pohoi se Gjermania ‘po ecën somnambul në një krizë të re emigracioni’. Për të vërtetuar mendimin e tij, ai tha se qendrat e pritjes në Gjermani tashmë ishin plot, me autoritetet komunale në një numër vendesh të tjera evropiane gjithashtu nën trysni.
Politikani theksoi se për shkak të shkatërrimit të infrastrukturës energjetike të Ukrainës nga sulmet ruse, ‘ne duhet të jemi gati që një numër i madh ukrainasish të vijnë në BE këtë dimër, dhe shumë prej tyre në Gjermani’.
Është e mundur që Gjermania do duhet të strehojë ukrainasit në palestra si dhe të kufizojë aktivitetet shkollore dhe të biznesit për të trajtuar krizën, vuri në dukje Weber.
“Gjermania nuk është e përgatitur për këtë gjendje. Qeveria federale thjesht i anashkalon sfidat.” – shtoi ai.
Weber trajtoi gjithashtu çështjen e refugjatëve që vijnë në Evropë nga Afrika përmes Italisë. Sipas tij, Gjermania duhet të ndihmojë Italinë të trajtojë krizën jo duke mbështetur përpjekjet e shpëtimit, por më tepër duke organizuar patrulla të përbashkëta evropiane ‘në kufijtë e jashtëm të Mesdheut’.
Në muajt e fundit, vende të ndryshme evropiane kanë grumbulluar ushqime dhe furnizime të tjera në pritje të një fluksi dimëror të refugjatëve ukrainas.
Sipas të dhënave të OKB-së, rreth 4.8 milionë refugjatë janë aktualisht të regjistruar në skema të ndryshme kombëtare të mbrojtjes në Evropë, me pothuajse tetë milionë ukrainas të zhvendosur të regjistruar në të gjithë Evropën.
