Parlamenti Evropian refuzoi të martën të miratojë buxhetin e vitit 2020 të Agjencisë Evropiane të Rojës Kufitare dhe Bregdetare (Frontex) për shkak të raporteve për shkelje të të drejtave të njeriut.
“345 eurodeputetë votuan në favor të rekomandimit të komisionit për të refuzuar buxhetin e Frontex-it, 284 votuan kundër (në favor të dhënies së buxhetit) dhe 8 abstenuan.” – thuhet në një deklaratë të Parlamentit Evropian.
Në fillim të këtij muaji, anëtarët e Komitetit të Kontrollit të Buxhetit rekomanduan moslëshimin e buxhetit 2020 për Frontex duke përmendur ‘peshën e sjelljes së keqe serioze të kryer’ dhe problemet e mundshme strukturore nën drejtorin e mëparshëm ekzekutiv të agjencisë, thuhet në deklaratë.
“Agjencia dështoi të mbronte të drejtat themelore të emigrantëve dhe azilkërkuesve dhe, sipas raportit të medias, ishte përfshirë në kthimin e paligjshëm të të paktën 957 refugjatëve midis marsit 2020 dhe shtatorit 2021.” – shtoi ajo.
Vetëvrasja e një anëtari të stafit, e cila ishte ‘e lidhur me praktikat e supozuara të ngacmimit seksual’, tronditi gjithashtu anëtarët e Parlamentit Evropian, thuhet në deklaratë, duke shtuar se nga 17 incidentet e ngacmimeve seksuale të paraqitura në agjenci në vitin 2020, 15 u gjykuan pa veprime të mëtejshme.
Komisionerja e BE-së për Çështjet e Brendshme, Ylva Johansson tha të hënën se ishte ‘tronditur’ nga një raport i fundit mbi Frontex që thoshte se agjencia e mbrojtjes së kufijve të BE-së fshehu kthimet e paligjshme të emigrantëve e azilkërkuesve nga Greqia në Detin Egje.
Johansson u tha anëtarëve të Parlamentit Evropian në Bruksel se ata e morën seriozisht çështjen që kur u shfaqën fillimisht akuzat se Greqia po shtynte emigrantët të kthehen në Turqi.
Në shkurt, Zyra Evropiane Kundër Mashtrimit (OLAF) përgatiti një raport mbi rolin e Frontex në shkeljen e të drejtave themelore në kufijtë e jashtëm të BE-së.
Johansson tha se raporti zbuloi keqmenaxhimin personal të tre personave nga administrata e Frontex, duke përfshirë drejtorin e atëhershëm.
Duke theksuar se Frontex ka një përgjegjësi të rëndësishme për të mbrojtur të drejtat themelore të njeriut teksa mbron kufijtë e jashtëm të BE-së, ajo tha se abuzimi me pushtetin i administratës së mëparshme është një çështje shumë serioze. Kjo ka dëmtuar perspektivat e institucionit për të përmbushur mandatin e tij, shtoi ajo.
