Ilir Meta kthehet pas 5 vitesh mungesë sot në partinë që ai vetë themeloi, LSI.
Vetëm një ditë pasi la detyrën e presidentit të Republikës, ai iu drejtua selisë së LSI-së ndërsa dha dhe një prononcim të shkurtër për mediet.
I pyetur se cili do të jetë roli që do ketë në opozitën shqiptare, Meta u përgjigj: “Ai që presin të gjithë ata që duan triumfin e demokracisë.”
Më pas u pyet nëse do ketë bashkëpunim me Sali Berishën, të shpallur “non grata” nga SHBA dhe Britania.
“Do bashkëpunoj me të gjithë ata që besojnë te referendumi, te sovraniteti, te populli i Shqipërisë.”– u përgjigj ish-presidenti.
Në orën 10:30 Meta pritet të bëjë daljen e parë për mediat nga selia e LSI-së.
“Në ora 10:30, ish-Presidenti i Republikës, Ilir Meta do të ketë një dalje për mediat në selinë e LSI!”- njoftoi zëdhënësi i tij Tedi Blushi.
Kujtojmë se shpesh herë në daljet e tij mediatike Meta shprehej se pas 24 korrikut, datë kur do të linte dhe detyrën e kreut të shtetit, do t’i kthehej politikës fuqishëm. Dhe pikërisht sot në orën 19:00 pritet të mbahet Konventa Kombëtare e LSI-së.
