Ministrja e Parë e Skocisë, Nicola Sturgeon, nisi sot një fushatë të re për pavarësinë e vendit të saj nga Mbretëria e Bashkuar.
Duke folur në një konferencë shtypi në Edinburg, Sturgeon zbuloi grupin e parë të letrave të reja, të titulluara: Më të pasur, më të lumtur, më të drejtë: Pse jo Skocia?
Duke këmbëngulur se ka një mandat të qartë për synimin e pavarësisë pasi shumica e skocezëve votuan për Partinë e saj Kombëtare Skoceze (SNP) në zgjedhjet e fundit, Sturgeon tha se Skocia po “frenohet” nën kontrollin e Westminster-it.
Sturgeon tha se skocezët po vuajnë nga një krizë e përkeqësuar e kostos së jetesës, rritja e ulët dhe pabarazia në rritje dhe të gjitha problemet e vendit janë më të këqija sepse Skocia nuk është e pavarur.
“A qëndrojmë të lidhur me një model ekonomik të Mbretërisë së Bashkuar që na shtyn në rezultate relativisht të dobëta ekonomike dhe sociale të cilat ka të ngjarë të përkeqësohen, jo më mirë jashtë Bashkimit Evropian, apo në vend të kësaj i ngremë sytë me shpresë dhe optimizëm dhe marrim frymëzim nga shtetet e krahasueshme në Evropë?”, pyeti ajo.
Ajo tha se tani është koha për të vendosur dhe debatuar një çështje të re për pavarësinë, duke shtuar se kryeministri i Mbretërisë së Bashkuar Boris Johnson “nuk ka autoritet demokratik në Skoci dhe nuk ka shumicë morale askund”.
“Brexit-i na ka nxjerrë nga BE-ja dhe tregu i vetëm kundër vullnetit tonë me dëme masive ndaj tregtisë, standardeve të jetesës dhe shërbimeve publike”, tha ajo.
Ministrja e Parë tha gjithashtu se Skocia, me pjesën tjetër të Mbretërisë së Bashkuar, mund të përballet me një luftë tregtare me BE-në pasi qeveria britanike kërcënon të shkelë ligjin ndërkombëtar, duke iu referuar projektligjit të publikuar të hënën për të ndryshuar në mënyrë të njëanshme Protokollin e Irlandës së Veriut.
Sturgeon ka thënë që kur qeveria e Mbretërisë së Bashkuar filloi negociatat e ndarjes me BE-në se zëri i vendit të saj u injorua dhe Skocia përfundimisht do të bëhej e pavarur, duke këmbëngulur për një referendum të dytë.
Megjithatë, një votim i tillë duhet të marrë një dritë jeshile nga qeveria qendrore në Londër, por Johnson e ka refuzuar një votim të tillë.
Referendumi i parë, ku votuesit skocezë u pyetëm nëse do të dëshironin të ndaheshin nga Britania, u mbajt në vitin 2014, vetëm dy vjet përpara referendumit historik për largim nga BE-ja.
Qeveria nën kryeministrin e atëhershëm David Cameron premtoi mirëkuptim më të mirë për skocezët nga Westminster-i dhe “kompetenca të reja të zgjeruara” për parlamentin skocez.
SNP, partia që udhëhoqi fushatën e pavarësisë, kishte besim të plotë se vendi do të mbijetonte dhe madje do të ishte më mirë jashtë Britanisë, e forcuar nga fushat e naftës, uiski “malt” me famë botërore, tekstili, motorët e avionëve, dhe shërbime të ndryshme bankare dhe financiare.
Por skocezët kundërshtuan ndarjen nga pjesa tjetër e Mbretërisë, pasi pak më shumë se 2 milionë vota (55,3%) u hodhën për të mbetur pjesë e Britanisë, ndërsa 1,62 milion (44.7%) njerëz votuan për pavarësinë.
Johnson dhe konservatorët skocezë kanë hedhur poshtë në mënyrë të përsëritur idenë e një referendumi të dytë, duke e quajtur referendumin e vitit 2014 një ngjarje “një herë në jetë” që dëshmoi se skocezët preferojnë bashkimin.
