Vendosni fjalën kyçe....

Antibiotiku ‘që vret superbakterin’ mund të shpëtojë miliona jetë – Studimi


Shkencëtarët në Mbretërinë e Bashkuar kanë dhënë lajmin e mirë për një antibiotik ‘që ndryshon lojën’ në një studim të ri të publikuar të martën, i cili mund të shpëtojë miliona njerëz në mbarë botën nga superbakteret rezistente ndaj ilaçeve.

Ekipi i studiuesve, duke punuar në bashkëpunim me Universitetin e Lincoln, arriti zbulimin duke zhvilluar lloje të reja të molekulës teixobactin, që vrau me sukses bakteret pa dëmtuar indin e gjitarëve ku u testua.

Duke përdorur një studim që përfshiu minjtë, studiuesit arritën të fshijnë me sukses një superbakter të njohur si MRSA, i cili më parë ka qenë rezistent ndaj antibiotikëve.

“Qëllimi ynë përfundimtar është që të kemi një numër ilaçesh të qëndrueshme nga platforma jonë sintetike modulare teixobactin, të cilat mund të përdoren si ‘vija e fundit e mbrojtjes’ kundër superbaktereve për të shpëtuar jetët e humbura aktualisht për shkak të AMR.” – tha Dr. Ishwar Singh, i cili drejtoi kërkimin.

Teixobactin është vlerësuar më herët si një antibiotik ‘që ndryshon lojën’, pas një studimi në vitin 2015, por hulumtimi i ri arriti të zhvillojë klasa ‘sintetike’ të ilaçit, duke lejuar shpërndarjen më të lehtë globale të trajtimit, zbuluan shkencëtarët.

Shëndeti Publik në Angli paralajmëroi në vitin 2017 se rezistenca ndaj antibiotikëve po krijon ‘një nga krizat më të rrezikshme globale me të cilat përballet bota moderne sot’, pasi shkencëtarët kanë frikë se antibiotikët përfundimisht nuk mund të trajtojnë më infeksionet serioze.

Raporti i Kërkimit Global mbi Rezistencën Antimikrobike, i botuar në ‘The Lancet’ në janar, zbuloi se më shumë se 1.2 milionë njerëz vdiqën nga infeksionet rezistente ndaj ilaçeve në vitin 2019.

4.95 milionë vdekje të tjera u shoqëruan në mënyrë indirekte me rezistencën antimikrobike në analizën e 204 vendeve dhe territoreve.

Një rishikim i rezistencës antimikrobike (AMR) i porositur nga qeveria e Mbretërisë së Bashkuar ka paralajmëruar se deri në vitin 2050, 10 milionë njerëz shtesë do të vdesin çdo vit nga infeksionet rezistente ndaj ilaçeve.