Vendosni fjalën kyçe....

Publikimi i tezës të letërsisë, reagon Ministria: I orkestruar politikisht, nuk ka ndikuar në procesin e provimit


Ministria e Arsimit, Sportit dhe Rinisë ka reaguar në lidhje me rastin e sotëm ku teza e provimit të Maturës Shtetërore të Gjuhës Shqipe dhe Letërsisë u publikua gjatë kohës që po zhvillohej.

MASR në reagimin e saj thotë se ky rast i orkestruar qëllimisht nga individë të ngarkuar politikisht do çohen para drejtësisë.

Ndërsa më tej ka siguruar se do kallëzojë penalisht shtetasin që ka publikuar testin e maturës në rrjetet sociale dhe të gjithë personat që fotografuan tezën dhe e dërguan atë jashtë qendrave të provimit.

Gjithashtu në reagim theksohet se nxjerrja jashtë e testit të Maturës nuk ka ndikuar në mbarëvajtjen e procesit.

Reagimi i plotë:

Ministria e Arsimit, Sportit dhe Rinisë (MASR) me shumë shqetësim e ka ndjekur rastin e sotëm të publikimit të pyetjeve pas fillimit të provimit të Gjuhës Shqipe dhe Letërsisë të Maturës Shtetërore 2021.

Vëmë në dijeni opinionin publik se ky rast, apo çdo rast tjetër i ngjashëm me të, që orkestrohet qëllimisht nga individë të ngarkuar politikisht do të çohen para drejtësisë në mënyrë që të mos cënohet procesi i Maturës Shtetërore. Ndjejmë keqardhje që ata gjejnë mënyrën më të pahijshme për të injektuar panik të panevojshëm tek maturantët dhe tek prindërit e tyre, ndërsa duhet të ishin bashkëpunues për të mirën e arsimit.

MASR do të kallëzojë penalisht shtetasin, i cili ka publikuar testin e Maturës Shtetërore të Gjuhës shqipe dhe Letërsisë të datës 7.6.2021 në rrjetet sociale gjatë kohës kur provimi ishte ende duke u zhvilluar, si dhe të gjithë pjesëmarrësit në procesin e Maturës Shtetërore të cilët kanë shkelur rregullat duke fotografuar dhe dërguar jashtë qendrave të provimit këtë test, gjatë kohës që ishte duke u zhvilluar.

Publikimi i testit në rrjete sociale pasi provimi kishte filluar NUK ka ndikuar në mbarëvajtjen e këtij provimi, teksa vlen të nënvizohet se i gjithë procesi është zhvilluar në zbatim të Rregullores së Maturës Shtetërore.

MASR dhe institucionet e saj të varësisë sigurojnë maturantët dhe prindërit e tyre se provimet janë zhvilluar dhe do të zhvillohen me të njëjtin përkushtim e vullnet për të realizuar një administrim të suksesshëm të këtij procesi.