Vendosni fjalën kyçe....

Mesazhi i Metës në Ditën Ndërkombëtare të Talasemisë: Bashkohuni me kauzën e dhurimit të gjakut, mjaftojnë 10 minuta për të shpëtuar fëmijët me këtë sëmundje


Në Ditën Ndërkombëtare të Talasemisë, presidenti Ilir Meta ka një mesazh për të gjithë qytetarët, të cilëve u bën thirrje të bashkohen me kauzën e dhurimit të gjakut.

Në një mesazh në rrjetet sociale, Kreu i Shtetit shprehet se kjo ditë na fton të gjithëve për të ndërgjegjësuar më shumë qytetarët dhe vendimmarrësit rreth kësaj sëmundjeje.

Vetëm 10 minuta thekson ai se duhen, për të dhuruar gjak dhe për të shpëtuar jetën e fëmijëve talasemikë.

“Dita Ndërkombëtare e Talasemisë, na fton të gjithëve për të ndërgjegjësuar më shumë qytetarët dhe vendimmarrësit rreth kësaj sëmundjeje, për të ndërmarrë nisma me qëllim parandalimin, menaxhimin dhe kurimin e saj, si dhe në veçanti për të shtuar përpjekjet në ndihmë të pacientëve dhe fëmijëve, që vuajnë, për të jetuar normalisht.

Është përgjegjësi e të gjithëve ne të eliminojmë pabarazitë shëndetësore dhe t’u ofrojmë të sëmurëve talasemikë, një jetë shoqërore cilësore, të denjë dhe të mirëintegruar, pa u stigmatizuar dhe margjinalizuar, apo më keq akoma, të vuajnë nga mungesa e gjakut të mjaftueshëm dhe të sigurt për nevojat e tyre jetësore.
Tashmë, që kemi një situatë më të qetë me pandeminë, me vaksinimin e një pjese të popullsisë, si dhe me imunizimin e një pjese tjetër, ju bëj thirrje të gjithë qytetarëve, veçanërisht të rinjve e të rejave të bashkohen me kauzën e dhurimit të gjakut.

Mjaftojnë vetëm 10 minuta për të dhuruar gjak dhe mbi të gjitha për të shpëtuar jetën e fëmijëve talasemikë.
Krenar dhe falenderues për rolin e jashtëzakonshëm të luajtur për këtë qëllim, veçanërisht për sensibilizimin frymëzues, që ‘Aleanca për Dhurimin e Gjakut’ ka luajtur në këto vite, për solidarizimin me kauzën humane dhe fisnike të dhurimit të gjakut.”– shkruan Presidenti Meta.