Lëvizja Vetëvendosje në Shqipëri ka dorëzuar në Komisionin Shtetëror të Zgjedhjeve 3765 firmat për kandidatin Boiken Abazi.
Abazi do garojë në qarkun e Tiranës dhe do mbështetet nga Qendra e Vetëvendosjes në Shqipëri.
Ndërsa pritet të dorëzohen edhe firmat për kandidatët e tjerë në Lezhë (Iliaz Shehu) dhe Gjirokastër (Kreshnik Merxhani).
Postimi i plotë:
Dorëzohen 3765 nënshkrime në mbështetje të kandidatit Boiken Abazi
Sot, 10 ditë para afatit, një dërgatë prej dhjetë vetash, anëtarë të komitetit nismëtar, përfaqësues e aktivistë të Lëvizjes VETËVENDOSJE! nga Shqipëria e Kosova dorëzuan në KQZ dosjet me nënshkrimet mbështetëse të 3765 qytetarëve të qarkut Tiranë për zyrtarizimin e kandidaturës së Boiken Abazit si kandidat nga zgjedhësit për zgjedhjet parlamentare të 25 prillit.
Mbështetja kaq e madhe prej qytetarëve nga bashkitë e qarkut Tiranë (Tirana, Kamza, Vora, Kavaja e Rrogozhina) nga shumë lagje e fshatra, na jep zemër për fushatën që na pret. Me idealet më të sinqerta për kombin e shoqërinë tonë, për drejtësi e zhvillim ekonomik, do të vazhdojmë aktivitete gjithnjë e më intensive. Falënderojmë nga zemra gratë e burrat që na kanë dhënë mbështetjen për kandidimin e z. Boiken Abazit, e në ditët në vijim do të angazhohemi me gjithë mundësitë që kemi për të mbledhur nënshkrimet e nevojshme në Lezhë, në mbështetje të Iliaz Shehut, dhe në Gjirokastër në mbështetje të Kreshnik Merxhanit.
