Opozita e Bashkuar ka reaguar ndaj firmosjes së marrëveshjes mes mazhorancës dhe opozitës parlamentare që i hap rrugën miratimit në Kuvend të ndryshimeve zgjedhore të kodit me marrëveshjen e arritur më 5 qershor dhe ndryshimeve kushtetuese për hapjen e listave.
Aktin e sotëm, opozita e bashkuar e ka quajtur dëshmi të planit diabolik të Ramës që fillimisht të miratojë marrëveshjen e 5 qershorit dhe më pas të zhbëjë atë me ndryshimet kushtetuese.
Më tej në deklaratën e lëshuar nga opozita e bashkuar thuhet se hapja e listave është gënjehstër e Ramës sepse qëllimi i vetëm është ndalimi i koalicioneve.
“Ndryshimi i njëanshëm kushtetues për ndalimin e koalicioneve zgjedhore zhbën të dyja marrëveshjet politike për zgjedhjet, atë të 14 Janarit dhe atë të 5 Qershorit.
Akti i sotëm është dëshmi e planit diabolik të Edi Ramës që të miratojë fillimisht për fasadë Marrëveshjen e 5 Qershorit, të vërë në lojë partnerët tanë strategjikë, SHBA dhe BE dhe vetëm 1 javë më vonë ta zhbëjë marrëveshjen me ndryshime të njënashme kushtetutese, që ndalojnë koalicionet si subjekt zgjedhor.
Edi Rama gënjen, kur thotë se po hap listat, sepse pjesën fituese të tyre, 1/3 e listës, e mban të mbyllur, duke dalë zbuluar se i vetmi qëllim është ai i ndalimit të koalicioneve si subjekt zgjedhor.
Zhbërja nga Edi Rama i marrëveshjeve të 14 Janarit dhe 5 qershorit përbën një akt të rrezikshëm me pasoja të paparashikueshme për stabilitetin e vendit”-thuhet në deklaratë.
Opozita e bashkuar e ka quajtur të paparecedentë thyerjen e besimit të ndërkombëtarëve të cilët insistojnë që të zbatohet Marrëveshja e 5 Qershorit pa asnjë ndryshim kushtetues që e cënon atë.
“Ky akt i paprecedentë në 30 vite pluralizëm është, po kështu, një thyerje e rëndë e besimit të partnerëve strategjikë SHBA dhe BE që u investuan, përshëndetën dhe vazhdojnë të insistojnë në zbatimin e Marrëveshjes së 5 qershorit pa asnjë ndryshim dhe pa ndryshime kushtetuese që e shkatërrojnë atë.
Ky akt tinzar prej frikacaku tregon tmerrin e kryeministrit në ikje nga zgjedhjet dhe rotacioni i pashmangshëm. Opozita e Bashkuar garanton të gjithë qytetarët se do të bëjë gjithçka, që faturën e rëndë që ky akt sjell për demokracinë, stabilitetin dhe integrimin e vendit ne Bashkimin Europian, ta paguajë vetëm Edi Rama dhe jo Shqipëria e shqiptarët”-përfundon komunikata.
