Ministrja e Shëndetësisë Ogerta Manastirliu ka publikuar disa pamje të rënda nga Spitali Infektiv, ku po trajtohen të sëmurët me koronavirus.
Në videon e publikuar nga ministrja shfaqen mjekë duke vrapuar dhe pacientë që ulërasin nga dhimbjet.
Një grua rënkon nga dhimbjet: “Më shpojnë kockat, oh moj nëna ime”.
Duket se ministrja përmes këtyre pamjeve, kërkon të frikësojë qytetarët që të ndërgjegjësohen për rrezikshmërinë e Covid-19 dhe të zbatojnë rregullat e vendosura nga qeveria.
“Lutemi! Vendoseni Maskën! Mos rrezikoni jetën tuaj dhe të njerëzve tuaj më të dashur!”– shkruan Manastirliu krahas videos.
Kujtojmë se ditën e sotme, Ministria e Shëndetësisë njoftoi se kishte ndryshuar orarin për përditësimin e të dhënave për Covid, për shkak të fluksit të shtuar të punës në Institutin e Shëndetit Publik.