Një pikturë e ekspozuar në Pallatin e Arteve të Bukura në Meksiko City, ka shkaktuar zemërim të madh, pasi në të shfaqet heroi revolucionar Emiliano Zapata veshur me taka të larta dhe me një kapelë rozë, i zhveshur dhe hipur mbi një kalë.
Një grup protestuesish mësynë mbrëmë në Pallatin e Arteve të bukura, duke bërtitur: “Digjeni atë, digjeni atë”.
BBC shkruan se nipi i Zapatës, Jorge Zapata González, dëshiron që piktura të hiqet nga ekspozita.
“Për ne si të afërm, kjo denigron figurën e gjeneralit tonë, duke e përshkruar atë si homoseksual”– tha Zapata González, duke shtuar se familja do të niste një padi nëse piktura nuk hiqej.
Emiliano Zapata ishte një drejtues në revolucionin meksikan i cili u vra në vitin 1919 në moshën 39 vjeçare. Ai mbetet një hero në sytë e shumë Meksikanëve.
Midis protestuesve ishin shumë fermerë që e admirojnë Zapatën, i cili ishte vetë një fermer i varfër që mori qëndrimin kundër përvetësimit të tokës nga pronarë të pasur.
Ata demonstruan jashtë muzeut në qendrën e qytetit të Meksikës me orë të tëra, disa prej duke bërtitur me shprehje homofobike, gjë që shkaktoi një kundër-demonstrim nga njerëzit që mbronin diversitetin seksual. Pati një përleshje midis dy palëve.
“Zapata” është bërë trend në “Twitter” me dhjetëra mijëra njerëz që shprehin mbështetjen e tyre për diversitetin dhe po aq kundërshtimin e tyre për pikturën.
Luis Vargas, kurator i ekspozitës, tha se piktura ishte thjesht një përfaqësim artistik që ngjall debate për çështje në shoqërinë meksikane, përfshirë homoseksualitetin.
Zyrtarët e muzeut kanë thënë se piktura nuk do të hiqet edhe pse protestuesit kanë kërcënuar të kthehen çdo ditë derisa ajo të hiqet.
Ekspozita zgjat deri në shkurt të vitit 2020.