Një zjarr i madh pyjor ka përfshirë provincën e Castellón në lindje të Spanjës, duke detyruar autoritetet të evakuojnë rreth 500 banorë, ndërsa dhjetëra zjarrfikës dhe mjete ajrore po luftojnë për të vënë flakët nën kontroll, përcjell Euronews.
Zjarri shpërtheu të dielën pasdite në zonën e Soneja, duke shkaktuar një reagim të menjëhershëm të shërbimeve të emergjencës. Avionët zjarrfikës kanë kryer hedhje të vazhdueshme uji mbi kodrat e përfshira nga flakët, ndërsa ekipet në terren po punojnë për të frenuar përhapjen e zjarrit pranë rrugëve, automjeteve dhe zonave të banuara.
Pamjet nga vendngjarja tregojnë shtëllunga të dendura tymi që mbulojnë zonën, ndërsa zjarrfikësit përpiqen të neutralizojnë vatrat aktive të zjarrit në një terren të vështirë malor.
Autoritetet spanjolle kanë bërë të ditur se situata mbetet nën monitorim, ndërsa kushtet e motit dhe temperaturat e larta po e vështirësojnë punën e ekipeve të ndërhyrjes.
Vala e zjarreve ka prekur edhe vende të tjera të Evropës Jugore, përfshirë Portugalinë dhe Greqinë, ku autoritetet vijojnë përpjekjet për të përballuar disa vatra aktive të zjarrit njëkohësisht.
