Mbledhja e Konferencës së Kryetarëve këtë të mërkurë është shoqëruar me debate të forta mes opozitës dhe mazhorancës, pa arritur një dakordësi për zhvillimin e mocionit me debat. Çështja i është kaluar seancës plenare për shqyrtim të mëtejshëm.
Deputetja e Partisë Demokratike, Ina Zhupa, ka reaguar ashpër gjatë diskutimeve, duke akuzuar mazhorancën për qëndrim ndaj protestave dhe për, siç tha ajo, përpjekje për të ndërtuar narrativa kundër tyre.
Sipas Zhupës, është e papranueshme që të “fabrikohen prova” për të sulmuar protestuesit, ndërsa theksoi se qeveria duhet të marrë në konsideratë kërkesat e qytetarëve.
“Është e turpshme të fabrikoni prova për të sulmuar protestuesit… protesta përfaqëson mijëra qytetarë”, u shpreh ajo, duke shtuar se pjesëmarrësit në protesta shprehin pakënaqësi të thellë ndaj qeverisë.
Deputetja e PD-së theksoi gjithashtu se opozita, sipas saj, përfaqëson qytetarët përmes nismave konkrete dhe jo përmes deklaratave politike, duke e krahasuar qëndrimin e opozitës me atë të mazhorancës në raport me protestat.
Mbledhja përfundoi pa marrëveshje mes palëve, ndërsa pritet që çështja e mocionit të diskutohet në seancën plenare të Kuvendit.
