Ushtria izraelite ka marrë nën kontroll Kalanë e Bofortit, një fortifikim 900-vjeçar dhe brezin e saj strategjik në jug të Libanit, njoftoi ushtria të dielën. Ky përbën një përparim të madh kundër grupit të mbështetur nga Irani, Hezbollah, pavarësisht armëpushimit nominal të shpallur më shumë se gjashtë javë më parë.
Ky aksion pason të shtunën, e cila ishte një nga ditët me sulmet më të rënda me zjarr nga Hezbollahu drejt Izraelit verior që nga armëpushimi i prillit, gjë që solli mbylljen e shkollave dhe kufizime të tjera.
Sipas ushtrisë, operacioni ishte i përqendruar në vendosjen e kontrollit mbi Brezin e Bofortit dhe zonën e Uadi al-Salukit, si dhe në dobësimin e milicisë së Hezbollahut dhe infrastrukturës së saj mbi këtë brez të ngritur nën drejtimin iranian. Ushtria njoftoi se një ushtar izraelit mbeti i vrarë gjatë operacionit. Nga ana tjetër, nuk pati komente të menjëhershme nga Libani apo nga Hezbollahu.
Pushtimi i kalasë mesjetare dhe i brezit malor thellon praninë e Izraelit në Liban, ndërsa fronti ushtarak Izrael-Hezbollah mbetet aktiv, edhe pse një armëpushim paralel po mbahet në luftën më të gjerë me Iranin.
Rëndësia strategjike
Hezbollahu u përfshi në luftën e SHBA-së dhe Izraelit kundër Iranit duke lëshuar raketa dhe dronë drejt Izraelit më 2 mars, disa ditë pasi filloi konflikti me Iranin. Që prej asaj kohe, Izraeli nisi përpjekjet për të larguar milicinë e mbështetur nga Irani nga kufiri i tij verior.
Përparimi drejt Kalanë së Bofortit u jep trupave izraelite një pikë vrojtimi të lartë mbi një pjesë të madhe të Libanit jugor dhe Izraelit verior, zona nga të cilat ishin ndërmarrë sulme ndaj qendrave të banuara izraelite, shkruan Reuters.
Hezbollahu ka kryer “sulme të shumta” nga ky brez malor, tha ushtria, duke shtuar se trupat e saj po operojnë kundër infrastrukturës së lëshimit në këtë zonë, nga e cila ishin shkrepur “qindra raketa civilëve izraelitë dhe ushtarëve të IDF-së”.
