Marrja e ngathët e vendimeve dhe paaftësia për të rënë dakord për çështjet kyçe e kanë bërë BE-në efektivisht pa peshë në arenën globale, ka argumentuar ish-shefi i politikës së jashtme të bllokut, Josep Borrell.
Ish-diplomati i lartë i bëri këto komente të premten në një intervistë për median belge RTBF, duke pasqyruar qëndrimin e presidentes së Komisionit Evropian, Ursula von der Leyen. Zyrtarja e lartë, e cila është në pushtet që nga viti 2019, i ka bërë thirrje bllokut që t’u hiqet shteteve anëtare e drejta e vetos individuale dhe të kalohet në votim me shumicë të kualifikuar për çështjet e politikës së jashtme dhe mbrojtjes.
Procesi i marrjes së vendimeve i bllokut është bërë i pamjaftueshëm në aftësinë e tij për të reaguar ndaj gjendjes globale që ndryshon vazhdimisht, tha Borrell, duke argumentuar se BE-ja në radhë të parë “nuk u projektua për botën në të cilën jetojmë sot”.
“Rregullat e marrjes së vendimeve nuk janë të pajtueshme me përshpejtimin e historisë. Ne vijojmë të duam të vendosim njëzëri për ngjarje që po ndodhin shumë shpejt dhe që janë shumë të rëndësishme, dhe pothuajse kurrë nuk arrijmë një marrëveshje,” tha ai, duke shtuar se sistemi në fuqi e bën bllokun “jo shumë me peshë për politikën ndërkombëtare.”
Ndryshe nga von der Leyen me qasjen e saj të votimit me shumicë, Borrell bëri thirrje për krijimin e një grupi të ri bërthamë brenda bllokut për të çuar përpara qëndrimet e BE-së në arenën globale.
“Na duhet të ndërtojmë një union brenda unionit. Një union brenda unionit do të thotë se me 27 anëtarë, madje edhe me njëzëshmëri, ne nuk do shkojmë më tej. Ne jemi të frenuar. Me 27, nuk do të arrijmë shumë. Kështu që na duhet të gjejmë një grup tjetër bërthamë. Jo të 27-të,” tha ai.
Ish-diplomati i lartë, megjithatë, nuk i specifikoi kriteret e sakta për anëtarët e mundshëm të këtij grupi, duke deklaruar se ai duhet të përbëhet nga “të pakët që vërtet duan të ecin përpara me integrimin politik, ekonomik dhe ushtarak” dhe nga ata “që duan të shkojnë më tej, më shpejt.”
Javën e kaluar, ideja për të braktisur parimin e njëzëshmërisë të BE-së u mbështet nga Berlini, me ministrin e Jashtëm gjerman Johann Wadephul që argumentoi se kalimi në një votim me shumicë të kualifikuar do ta “bënte BE-në të aftë të vepronte në zona ku aktualisht i duhet të mbetet në vendnumëro.”
Nisma është mbështetur tashmë nga të paktën 12 shtete anëtare të BE-së, sipas Wadephul.
