Mijëra njerëz janë zhvendosur pasi një zjarr shkatërroi rreth 1,000 shtëpi në një fshat bregdetar në Malajzi, njoftoi të dielën departamenti i zjarrfikësve.
Autoritetet u njoftuan për zjarrin në rrethin e Sandakanit rreth orës 01:32 të mëngjesit, tha në një deklaratë shefi i shërbimit zjarrfikës, Jimmy Lagung.
“Erërat e forta dhe afërsia e madhe e shtëpive bënë që zjarri të përhapej me shpejtësi, ndërsa kushtet e baticës së ulët e bënë gjithashtu të vështirë sigurimin e një burimi uji të hapur,” tha Lagung.
Zjarri shpërtheu në një nga “fshatrat mbi ujë” të Sabahut, të cilët kanë shtëpi druri të ndërtuara mbi hunj dhe janë banesat e disave prej komuniteteve më të varfra të vendit, duke përfshirë shumë njerëz pa shtetësi dhe grupe indigjene.
Mbi 9,000 banorë janë prekur nga zjarri, megjithëse nuk është raportuar asnjë vdekje, tha policia e Sandakanit, sipas agjencisë shtetërore të lajmeve Bernama, shkruan Reuters.
Kryeministri i Malajzisë, Anwar Ibrahim, tha se qeveria federale po koordinohet me autoritetet e Sabahut për të ofruar ndihmë bazë dhe zhvendosje të përkohshme për të prekurit.
“Prioriteti tani është siguria e viktimave dhe ndihma e menjëhershme në terren,” tha ai në një postim në Facebook.
