Një ngjarje e mundshme kriminale është parandaluar mbrëmjen e djeshme në Vlorë, ku policia ka arrestuar në flagrancë një 39-vjeçar, i cili dyshohet se u konfliktua me një tjetër shtetas dhe mbante me vete armë zjarri.
Sipas njoftimit të Policia e Shtetit, shërbimet e Drejtorisë Vendore të Policisë Vlorë ndërhynë pas një njoftimi për konflikt në ambientet e një lokali në lagjen “Uji i Ftohtë”. Gjatë ndërhyrjes, shtetasi me inicialet A. Sh., sapo ka konstatuar praninë e policisë, ka tentuar të fshehë në një lulishte një pistoletë me krehër me fishekë që mbante me vete.
Nga hetimet paraprake dyshohet se A. Sh. ishte konfliktuar për motive të dobëta me shtetasin B. J., 30 vjeç, banues në Vlorë. Në përfundim të veprimeve procedurale, arma e zjarrit me municion u sekuestrua në cilësinë e provës materiale, ndërsa 39-vjeçari u arrestua në flagrancë.
Materialet procedurale i janë referuar Prokurorisë për veprime të mëtejshme, ndërsa policia thekson se mbetet e angazhuar për garantimin e rendit dhe sigurisë publike, duke reaguar ndaj çdo rasti që cenon qetësinë e qytetarëve.
