Çmimi i arit vijoi rritjen edhe të enjten, duke arritur nivele historike, teksa investitorët po zhvendosin kapitalet drejt aseteve të sigurta për shkak të pasigurive gjeopolitike dhe ekonomike. Ari u afrua pranë nivelit 5 600 dollarë për onzë, që përkthehet në rreth 180 dollarë për gram ose 180 000 dollarë për kilogram, përcjell Reuters.
Në tregun spot, ari u rrit me 2.7%, duke arritur në 5 546 dollarë për onzë, ose afërsisht 178 dollarë për gram, pasi më herët gjatë ditës shënoi një rekord historik prej 5 595 dollarësh për onzë. Ky është sesioni i nëntë radhazi ku ari thyen rekorde të reja çmimi.
Në SHBA, kontratat e arit për dorëzim në muajin shkurt u rritën me 4.5%, duke u tregtuar rreth 5 539 dollarë për onzë, ndërsa maksimumi historik arriti në 5 627 dollarë për onzë (rreth 181 dollarë për gram).
Ari e kaloi për herë të parë nivelin 5 000 dollarë për onzë në fillim të javës dhe ka fituar mbi 10% vetëm gjatë kësaj jave. Që nga fillimi i vitit, çmimi i arit është rritur me më shumë se 27%, pas një rritjeje prej 64% gjatë vitit 2025.
