Mbylljet e qeverisë në SHBA po bëhen gjithnjë e më të zakonshme, me mandatin e parë presidencial të Donald Trump që shënoi tre raste të tilla. Një prej tyre ishte edhe mbyllja më e gjatë në historinë amerikane, e cila zgjati 35 ditë.
Përpara Trump, rekordin e mbante Bill Clinton me një mbyllje 21-ditore të qeverisë në vitin 1995, drejt fundit të mandatit të tij të parë. Republikanët, pasi kishin marrë kontrollin e të dyja dhomave të Kongresit, kërkonin të miratonin një buxhet që përfshinte ndër të tjera kufizime në shpenzimet për Medicare.
Edhe Barack Obama u përball me një mbyllje 16-ditore të qeverisë në vitin 2013, për shkak të legjislacionit të tij për kujdesin shëndetësor.
Ndërsa Ronald Reagan, gjatë dy mandateve të tij në vitet 1980, kishte numrin më të madh të mbylljeve të qeverisë – tetë gjithsej. Megjithatë, të gjitha ishin relativisht të shkurtra, me më të gjatën që zgjati vetëm tre ditë, shkruan BBC.
