Forcat e Mbrojtjes së Izraelit (IDF) njoftuan të shtunën se kanë vrarë Mohammed Adin, komandantin e batalionit Daraj-Tuffah të Hamasit, në një sulm ajror të kryer një ditë më parë në verilindje të qytetit të Gazës. Sipas burimeve ushtarake, Adin ndodhej në shoqërinë e disa figurave të tjera të larta të Hamasit në momentin e goditjes.
Vrasja e tij përfaqëson një tjetër goditje të rëndësishme për udhëheqjen ushtarake të Hamasit, si pjesë e ofensivës së nisur nga Izraeli me emrin “Karrocat e Gedeonit”. Deri më tani, sipas IDF, janë eliminuar tre komandantë brigadash që udhëhoqën Hamasin pas vrasjes së liderit Yahya Sinwar, përcjell YNetNews.
Mes tyre janë përmendur Mohammed Sinwar, vëllai i Yahya Sinwar dhe udhëheqës de facto i Hamasit; komandanti i brigadës së Rafahut, Mohammed Shabana; dhe Hakam al-Issa, një nga themeluesit e Hamasit dhe përgjegjës për mbështetjen luftarake në krahun ushtarak të grupit.
Në total, që nga fillimi i operacionit, ushtria izraelite thotë se ka vrarë mbi 1,300 anëtarë të Hamasit, përfshirë 7 komandantë batalionesh dhe 39 komandantë kompanish.
Mbrëmjen e së shtunës, IDF realizoi sulme të gjera ajrore në Beit Hanoun, një qytet afër kufirit verior të Rripit të Gazës. Më shumë se 35 objektiva të Hamasit u goditën, përfshirë infrastrukturën e tunelëve nëntokësorë. Pamjet e publikuara nga IDF tregonin shtëllunga të mëdha tymi që ngriheshin në një zonë thuajse të shkatërruar.
Sulmet e reja pasuan një pritë të Hamasit më herët gjatë javës, ku humbën jetën pesë ushtarë izraelitë. Forcat izraelite u goditën fillimisht nga një shpërthim në një zonë të kurthuar dhe më pas nga zjarri i drejtpërdrejtë i militantëve palestinezë.
Në përgjigje, brigada Givati nën komandën e Divizionit 162 i është bashkuar forcave të Divizionit 99 për të rrethuar Beit Hanoun dhe për të zhdukur infrastrukturën e Hamasit. Sipas IDF, pjesa më e madhe e përpjekjeve është përqendruar në rrjetin nëntokësor të tunelëve dhe në eliminimin e celulave të armatosura të Hamasit që operojnë në këtë zonë.
