Nëna e adoleshentit të akuzuar për vrasjen e dy nxënësve dhe dy mësuesve në një shkollë të mesme në Xhorxhia të mërkurën telefonoi shkollën atë mëngjes dhe paralajmëroi për një “urgjencë ekstreme”, raportoi Washington Post.
Marcee Grey, nëna e sulmuesit të dyshuar, 14-vjeçari Colt Grey, tha se i tha sekretares së shkollës që ta gjente menjëherë djalin e saj, raportoi gazeta. Të dhënat telefonike të siguruara nga një i afërm tregojnë një telefonatë 10-minutëshe në shkollën e mesme Apalachee në Xhorxhia, në orën 9:50 të mëngjesit, rreth 30 minuta para sulmit.
Grey nuk pranoi të japë hollësi se çfarë e nxiti telefonatën e saj, por i tha Washington Post-it të shtunën se ajo e kishte ndarë këtë informacion me forcat e rendit. Ajo shprehu keqardhjen për “dhimbjen dhe vuajtjen” që po kalojnë viktimat dhe familjet e tyre.
Një administratore shkolle shkoi në orën e matematikës së djalit të saj atë mëngjes, sipas një nxënësi tjetër, raportoi WP, por ai nuk ishte në dhomë.
Colt Grey është akuzuar si i rritur me katër akuza për vrasje. Babai i tij, Colin Grey, është gjithashtu i akuzuar për vrasje, vrasje të pavullnetshme dhe mizori ndaj fëmijëve, në një strategji ligjore në zhvillim për të mbajtur prindërit përgjegjës për lejimin e të miturve që të kenë qasje të armët e zjarrit.
Prokurorët thonë se Colin Grey i siguroi të birit armën që përdori gjatë sulmit.
Në maj 2023, hetuesit nga një qark fqinj intervistuan si Colin ashtu edhe Colt Grey në lidhje me kërcënimet në internet për të kryer një sulm në shkollë. Colt Grey tha se ai nuk i kishte bërë kërcënimet dhe babai i tij tha se djali i tij nuk kishte qasje në pushkët e tij të gjuetisë.
Çështja u mbyll pasi hetuesit nuk mundën të vërtetonin se as Grey ishte i lidhur me kërcënimet.
