Nëntëmbëdhjetë liderë evropianë bënë thirrje të premten për krijimin e shpejtë të qendrave të kthimit të emigrantëve në vende të treta, pas miratimit nga Parlamenti Evropian të rregullave të reja që synojnë të lehtësojnë dëbimin e personave që nuk kanë të drejtë të qëndrojnë në Bashkimin Evropian.
Në një letër të përbashkët të iniciuar nga kryeministrja daneze Mette Frederiksen dhe kryeministrja italiane Giorgia Meloni, liderët kërkuan zbatimin e shpejtë të asaj që ata e përshkruan si “zgjidhje të zbatuara në vende të treta”.
“Tani duhet të tregojmë rezultate konkrete që bëjnë vërtet ndryshim për qytetarët tanë dhe të ecim sa më shpejt të jetë e mundur me zgjidhjet e zbatuara në vende të treta”, thuhej në letër, sipas agjencisë kombëtare belge të lajmeve Belga.
Nisma vjen pas miratimit këtë javë nga Parlamenti Evropian të një rregulloreje të re për kthimin e migrantëve, e cila krijon një kuadër ligjor që u mundëson shteteve anëtare të negociojnë me vende jashtë BE-së për ngritjen e këtyre strukturave.
Liderët përmendën qendrat e diskutueshme të Italisë në Shqipëri si një shembull të asaj që ata e quajtën “zgjidhje inovative”, duke shtuar se disa vende të tjera po shqyrtojnë tashmë marrëveshje të ngjashme.
“Vende të tjera po punojnë aktualisht për zhvillimin e mundësive të reja, përfshirë qendrat në vende të treta”, thuhej në letër. “Ne do të marrim personalisht drejtimin për të siguruar që vizionet tona të bëhen realitet.”
Nënshkruesit i kërkuan gjithashtu Komisionit Evropian të mbështesë këtë iniciativë përmes financimit nga buxheti i Bashkimit Evropian.
Danimarka dhe Holanda janë ndër vendet që aktualisht po zhvillojnë bisedime me shtete jashtë BE-së për ngritjen e këtyre qendrave.
Mes vendeve që nënshkruan letrën ishin Belgjika, Holanda, Polonia, Austria, Greqia dhe Hungaria.
Gjermania, Franca dhe Spanja nuk iu bashkuan nismës.
Paketa e reformës, e dakordësuar paraprakisht mes Parlamentit Evropian dhe Këshillit të BE-së më 1 qershor, u miratua këtë javë nga seanca plenare e Parlamentit Evropian.
Sipas rregullave të reja, vendimet për kthimin e lëshuara nga autoritetet kombëtare do t’i detyrojnë individët të largohen menjëherë nga territori i një shteti anëtar ose brenda një afati të caktuar.
Legjislacioni i ri parashikon gjithashtu mundësinë e krijimit të të ashtuquajturave “qendra kthimi” në vende të treta që janë të gatshme të presin personat e kthyer, duke përjashtuar të miturit e pashoqëruar, me kusht që marrëveshjet të respektojnë standardet e të drejtave të njeriut dhe detyrimet e së drejtës ndërkombëtare.
Përpjekjet e mëparshme për ngritjen e qendrave për migrantët në vende të treta kanë shkaktuar polemika dhe kritika, përfshirë planin e dështuar të qeverisë së mëparshme konservatore të Britanisë për dërgimin e migrantëve në Ruandë, shkruan AA.
