Një varkë me rreth 105 persona është përmbysur në Mesdheun qendror, pasi ishte nisur nga Libia, duke lënë të paktën 70 persona të zhdukur, përcjell Euronews.
Sipas organizatave Sea-Watch dhe Mediterranea Saving Humans, nga aksidenti janë shpëtuar 32 persona, ndërsa janë gjetur edhe dy trupa të pajetë.
Të mbijetuarit u shpëtuan nga dy anije tregtare, të cilat i transportuan drejt ishullit italian Lampedusa, një nga pikat kryesore të mbërritjes së emigrantëve që nisen nga Afrika e Veriut drejt Europës.
Sipas raportimeve, ngjarja ndodhi në një zonë kërkim-shpëtimi që administrohet nga autoritetet libiane. Pamje ajrore të publikuara nga Sea-Watch tregojnë disa persona të kapur pas trupit të përmbysur të varkës, ndërsa anijet afrohen për t’i shpëtuar.
Organizata Mediterranea Saving Humans e cilësoi ngjarjen si pasojë e politikave të vendeve europiane që, sipas saj, nuk ofrojnë rrugë të sigurta dhe ligjore për emigrantët.
Sipas të dhënave të Organizatës Ndërkombëtare për Migracionin, që nga fillimi i vitit 2026, të paktën 683 emigrantë kanë humbur jetën ose rezultojnë të zhdukur në Mesdhe, ndërsa mbi 6,100 persona kanë mbërritur në territorin italian gjatë së njëjtës periudhë.
