Kryeministri i Kosovës, Albin Kurti, ka reaguar ndaj pretendimeve për trafik organesh që lidhen me Ushtrinë Çlirimtare të Kosovës (UÇK), duke i cilësuar ato si një “narrativë hibride” kundër vendit. Në një postim në rrjetet sociale, Kurti theksoi se e ashtuquajtura “Shtëpi e Verdhë” nuk ka ekzistuar kurrë si vend për trafikimin e organeve dhe se akuza të tilla synojnë të dëmtojnë luftën çlirimtare të UÇK-së.
Kurti bëri këto deklarime gjatë hapjes së Konferencës së Dytë Ndërkombëtare “Nga lufta në rimëkëmbje”, organizuar nga Instituti për Krimet e Kryera gjatë Luftës në Kosovë. Ai nënvizoi se lufta e UÇK-së ishte e drejtë dhe e domosdoshme për liri dhe mbijetesë, duke qenë përgjigje ndaj represionit sistematik dhe shkeljeve të të drejtave të popullit kosovar.
“Kjo konferencë është pjesë e procesit të gjerë shtetëror dhe shoqëror për përballje me të kaluarën, për dokumentim të së vërtetës dhe drejtësi. Instituti i Krimeve të Kryera gjatë Luftës ka forcuar kapacitetet dokumentuese dhe arkivore, duke siguruar që çdo krim i regjistruar dhe çdo viktimë të mos harrohet”, shkroi Kurti.
Ai shtoi se akuza ndaj UÇK-së, përfshirë pretendimet për “Shtëpinë e Verdhë”, janë pjesë e një narrative hibride të Serbisë dhe se ato nuk mund të zbehin karakterin çlirimtar e antikolonialist të luftës. Kryeministri gjithashtu përmendi rëndësinë e dokumentimit ndërkombëtar dhe bashkëpunimin me Mekanizmin Ndërkombëtar Rezidual për krijimin e një qendre informacioni dhe dokumentimi në Kosovë.
Në përfundim, Kurti riafirmoi angazhimin e shtetit për drejtësi, dokumentim të plotë dhe ruajtje të kujtesës historike, duke lidhur Ditën e Pavarësisë me përgjegjësinë për reflektimin shkencor dhe institucional mbi plagët e luftës dhe rrugën e rimëkëmbjes së Kosovës.
“Kosova e së nesërmes është Kosovë e dijes, e drejtësisë dhe e bashkëpunimit. Me përkushtim, profesionalizëm dhe dashuri për vendin, ne ndërtojmë një Republikë sovrane dhe demokratike, ku barazia dhe dinjiteti janë themeli i jetës së qytetarëve,” përfundoi Kurti.
