Forcat pakistaneze të sigurisë kanë vrarë 145 militantë gjatë një operacioni intensiv 40-orësh, i ndërmarrë pas një serie sulmesh të koordinuara me armë zjarri dhe mjete shpërthyese në provincën Balokistan, ku humbën jetën rreth 50 persona, bëri të ditur të dielën kryeministri provincial.
Provinca jugperëndimore e Balokistanit po përjeton një nga episodet më të rënda të dhunës në vitet e fundit, ndërsa grupet kryengritëse në këtë rajon strategjik, të pasur me burime natyrore dhe që kufizohet me Iranin dhe Afganistanin, kanë intensifikuar ndjeshëm sulmet ndaj forcave të sigurisë, civilëve dhe infrastrukturës publike.
Ministri i Shtetit për Punët e Brendshme, Talal Chaudhry, deklaroi se sulmuesit, të maskuar si civilë, depërtuan të shtunën në spitale, shkolla, banka dhe tregje, ku hapën zjarr ndaj qytetarëve. Sipas tij, militantët vepruan duke u përzier me popullsinë dhe duke përdorur civilët si mburoja njerëzore.
“Në çdo rast, ata u paraqitën si qytetarë të zakonshëm dhe shënjestruan pa dallim njerëz që punonin në dyqane dhe hapësira publike,” tha Chaudhry.
Përgjegjësia për sulmet
Grupi separatist i shpallur i paligjshëm, Ushtria Çlirimtare e Balokistanit (BLA), mori përgjegjësinë për sulmet, duke njoftuar nisjen e një operacioni të koordinuar të quajtur “Herof” (Stuhia e Zezë), i cili kishte në shënjestër forcat e sigurisë në mbarë provincën.
Në Kueta, kryeqytetin e Balokistanit, gjurmët e dhunës ishin të dukshme: automjete të djegura në një stacion policie, ndërtesa të shpuara nga plumbat dhe rrugë të mbyllura me shirita sigurie. Forcat e rendit shtuan patrullimet dhe vendosën kufizime lëvizjeje për arsye sigurie.
Bilanci i viktimave
Sipas kryeministrit provincial Sarfraz Bugti, nga sulmet e militantëve u vranë 17 pjesëtarë të forcave të rendit dhe 31 civilë. Ushtria e Pakistanit konfirmoi se 92 militantë u neutralizuan të shtunën dhe 41 të tjerë të premten.
Bugti theksoi se autoritetet kishin informacion paraprak nga shërbimet e inteligjencës për planifikimin e sulmeve dhe, si pasojë, kishin nisur operacione parandaluese një ditë më herët. Ai shtoi se ky përbën numrin më të lartë të militantëve të vrarë brenda një periudhe kaq të shkurtër që nga përshkallëzimi i kryengritjes në rajon, shkruan Reuters.
