Diosdado Cabello mban një kopaçe druri në një foto promovuese nga emisioni i tij javor në televizionin shtetëror të quajtur “Bringing Down the Hammer”.
Midis presidentit amerikan Trump dhe vizionit të tij për një Venezuelë si superfuqi nafte të qëndrueshme dhe miqësore me SHBA-në, shfaqet një njeri: Diosdado Cabello, udhëheqësi de facto agresiv dhe ekscentrik i forcave të sigurisë dhe milicive brutale të Venezuelës, dhe një faktor i paparashikueshëm në të ardhmen e vendit.
Cabello, emri i parë i të cilit do thotë “i dhënë nga Perëndia” në spanjisht, e ka pozicionuar veten prej kohësh si mbrojtësin më të egër të regjimit, duke komanduar disa nga “colectivos” – bandat e armatosura që vërshuan nëpër Karakas me motoçikleta këtë javë në një shfaqje kërcënuese force.
I akuzuar nga SHBA-ja së bashku me Nicolás Maduron e rrëzuar, Cabello përballet me një zgjedhje: të mbështesë qeverinë e re të rivales së tij, presidentes në detyrë Delcy Rodríguez, ose të bëjë një lëvizje të guximshme për pushtet vetë, duke e rrëzuar atë dhe duke rrezikuar një përplasje ballë për ballë me komandot amerikane.
“Cabello ka shumë për të humbur dhe ka të ngjarë të kuptojë se mes kërkesave të Uashingtonit, largimi i tij mund të shfaqet më shpejt se sa pritet,” tha Daniel Lansberg-Rodriguez nga “Aurora Macro Strategies”.
I dhënë pas rrotullimit të një kopaçeje me gunga ndërsa shpërndan teori konspirative në emisionin e tij javor disaorësh në televizionin shtetëror të quajtur “Bringing Down the Hammer”, tashmë në episodin e tij të 556-të, Cabello është vështirë të parashikohet.
Cabello, një 62-vjeçar, titulli zyrtar i të cilit është ministër i Brendshëm, Drejtësisë dhe Paqes, deri më tani ka sinjalizuar unitet, duke marrë pjesë në ceremoninë e betimit të Rodriguez-it të hënën, ku ishin të pranishme fraksione të ndryshme të partisë socialiste në pushtet të Venezuelës.
Por atë natë, Cabello ishte i armatosur me një pushkë dhe po ngrinte peshë forcat e sigurisë me uniforma të zeza përpara se ato të patrullonin Karakasin për të parandaluar qytetarët të protestonin.
Diosdado Cabello foli në një tubim në mbështetje të presidentit të rrëzuar venezuelian Nicolás Maduro dhe gruas së tij, Cilia Flores, në Karakas, Venezuelë, të martën
Diosdado Cabello foli në një tubim në mbështetje të presidentit të rrëzuar venezuelian Nicolás Maduro dhe gruas së tij, Cilia Flores, në Karakas, të martën.
“Të dyshosh është tradhti!” tha ai, përpara se t’i thoshte grupit të armatosur: “Tani, drejt betejës në rrugë për fitore.”
Nën gjendjen e jashtëzakonshme që qeveria deklaroi pas kapjes së Maduros, forcat e sigurisë u urdhëruan të gjurmonin simpatizantët e SHBA-së, sipas medias zyrtare, ku qeveria venezueliane publikon ligjet dhe dekretet e reja. Banorët në kryeqytet raportuan postblloqe të reja rreth qytetit ku burra të armatosur dhe të maskuar kontrollonin telefonat e venezuelianëve të thjeshtë për mesazhe kundër qeverisë.
Fushata e frikës e udhëhequr nga Cabello dukej se binte ndesh me komentet e Trump-it të martën, që sugjeronin se regjimi mund të ishte duke zbutur mjetet e tij shtypëse.
“Ata kanë një dhomë torture në mes të Karakasit që po e mbyllin,” tha Trump në një konferencë shtypi.
Cabello ka personifikuar lëvizjen socialiste në pushtet të Venezuelës si pak të tjerë. Si kapiten i ushtrisë, ai u miqësua fillimisht me të ndjerin Hugo Chávez me të cilin luajti në një ekip bejsbolli gjatë kohës kur ishin në akademinë ushtarake. Më vonë ai u bë një nga togerët më besnikë të tij.
Gjatë grushtit të shtetit të dështuar të Chavez-it në vitin 1992, Cabello komandoi tanket në një sulm në pallatin presidencial “Miraflores”. Ai kreu disa vite burg derisa atij dhe konspiratorëve të tjerë iu dha falja. Në vitin 2002 Cabello ndihmoi Chavez-in, atëherë president, të kthehej në pushtet pas një grushti shteti.
Presidenti i Venezuelës Hugo Chavez, djathtas, përshëndet Diosdado Cabello në pallatin presidencial Miraflores në 2002
Gjatë viteve, familja e tij ka marrë pozita me ndikim në qeveri. Të paktën pesë anëtarë të familjes Cabello janë në listën e zezë të Thesarit të SHBA-së për korrupsion të dyshuar dhe si anëtarë të diktaturës ushtarake, akuza që Cabello dhe të afërmit e tij i mohojnë si pjesë e një fushate shpifjeje kundër qeverisë. Ata përfshijnë vëllain e tij më të vogël, José Cabello, i cili drejton agjencinë tatimore të vendit, dhe vajzën e tij, Daniella Cabello, një personazh i njohur që drejton një nismë të mbështetur nga shteti për të promovuar eksportet venezueliane si kafenë dhe çokollatën.
Në vitin 2016, Cabello ngriti një padi për shpifje në Manhattan kundër Dow Jones & Co., botuesit të The Wall Street Journal, pasi gazeta raportoi se ai ishte nën hetim nga Departamenti i Drejtësisë për trafik të dyshuar droge dhe pastrim parash. Një gjykatës e hodhi poshtë padinë vitin e ardhshëm, dhe ai përfundimisht u akuzua për akuza droge.
Sot, ndërsa pjesa më e madhe e elitës së regjimit përballet me sanksione financiare të SHBA-së, Cabello është një nga dy anëtarët e vetëm të kabinetit të lartë të akuzuar zyrtarisht në SHBA për trafik droge. Ai emërohet si bashkë-i pandehur në aktakuzën e SHBA-së kundër Maduros, e cila u bë publike pak para se udhëheqësi i rrëzuar venezuelian të dërgohej në gjykatë në Nju Jork këtë javë. Cabello i mohon akuzat.
Cabello tregoi se sa jetik është pas zgjedhjeve presidenciale të korrikut 2024, ku Maduro deklaroi fitoren pavarësisht se tabelat e votimit tregonin se ai kishte humbur thellë ndaj kandidatit të opozitës Edmundo Gonzalez, një diplomat në pension. Cabello u emërua ministër i Brendshëm javë më vonë, ndërsa regjimi përdori forcat paramilitare për të shtypur lagjet e varfra, burgosi aktivistë të të drejtave të njeriut dhe detyroi rivalët politikë të largoheshin nga vendi.
Diosdado Cabello në një tubim të vitit 2024 në Karakas në mbështetje të fitores së shpallur të Nicolas Maduro
Vetë emri i tij ngjall frikë. Venezuelianët brenda vendit të martën kryesisht kundërshtuan të flisnin për Cabello-n nga frika e hakmarrjes. Shumë që pranuan, kërkuan të mos emëroheshin.
Një grua 50-vjeçare në qytetin veriperëndimor të Maracaibo-s tha se Cabello shihet si dikush që e njeh vendin dhe të gjitha lëvizjet e tij, duke ushqyer thashethemet se ai do përpiqej të merrte pushtetin.
Shumë venezuelianë e njohin atë nga paraqitjet e tij të shpeshta në ngjarje publike dhe nga emisioni i tij televiziv, i cili transmetohet prej më shumë se një dekade.
Cabello flet për orë të tëra, duke përzier komentet politike me humorin e zi, ndërsa një audiencë e vogël duartroket dhe qesh. Ai lëshon biseda telefonike të regjistruara fshehurazi midis krerëve të opozitës. Ai mburret se mban të burgosur të akuzuar si spiunë të SHBA-së.
Në Uashington, zyrtarët dhe ligjvënësit amerikanë shpresojnë që Rodriguez mund të përmbajë Cabello-n.
“Ditët e ardhshme do jenë kyçe,” tha udhëheqësi i shumicës në Senat, John Thune. Për Rodriguez-in, ai tha: “Më kanë thënë se ajo është një person praktik, një person pragmatik.”
Ndërsa Cabello ka sinjalizuar se nuk do e destabilizojë situatën, disa parashikojnë se kjo nuk do zgjasë shumë, veçanërisht kur aleatët e vjetër të Maduros të fillojnë grindjet për kontrollin e pushtetit.
“Diosdado është njeriu më i vështirë për t’u trajtuar. Asgjë tek ai nuk sugjeron se ai do ishte i gatshëm të negocionte,” tha Ryan Berg, drejtor për Amerikën në Qendrën për Studime Strategjike dhe Ndërkombëtare, një grup politikash me bazë në Uashington.
“Nuk shoh që një marrëdhënie SHBA-Delcy Rodriguez të jetë në gjendje të funksionojë në planin afatgjatë,” tha Berg.
“Janë bërë 27 vjet që ky regjim përdor SHBA-në si një justifikim për çdo gjë që ka shkuar keq.”
Diosdado Cabello në një tubim vitin e kaluar për të përkujtuar 33-vjetorin e grushtit të shtetit të dështuar ushtarak të Hugo Chávez
Cabello ka qenë pranë udhëheqjes së vendit në raste të shumta. Ai zyrtarisht mbajti postin presidencial për disa orë natën e 13 prillit 2002, derisa Chavez u rikthye pas tentativës për grusht shteti. Dhe në paraqitjen e fundit televizive të Chavez-it para se të vdiste nga kanceri në vitin 2013, Cabello dhe Maduro qëndronin anash tij ndërsa ai u thoshte besnikëve të mbështetnin këtë të fundit si president pas vdekjes së tij.
Geoff Ramsey, një bashkëpunëtor i lartë jorezident në Këshillin Atlantik në Uashington, tha se Cabello ka pasur gjithmonë sytë te froni, edhe pse ai do të ishte i papranueshëm për komunitetin ndërkombëtar dhe atë të biznesit.
“Cabello ka reputacionin e një rrugaçi makiavelist dhe është e vështirë të përfytyrohet kjo administratë e SHBA-së ose ndonjë tjetër të afrohet me të,” tha Ramsey.
“Delcy mund të ketë vëmendjen e Donald Trump-it, por ajo nuk ka armët, dhe Cabello e di këtë.”
VINI RE: Ky shkrim është pronësi intelektuale e Wall Street Journal
Përgatiti për Hashtag.al, Klodian Manjani
