Drejtoresha e Inteligjencës Kombëtare të SHBA-së, Tulsi Gabbard, ka akuzuar shtetet evropiane të NATO-s se po përpiqen ta tërheqin Uashingtonin në një përplasje të drejtpërdrejtë me Rusinë dhe ka sulmuar ashpër agjencinë Reuters për “nxitje të histerisë” me qëllim shitjen e luftës.
Në një raport të publikuar të premten, Reuters pretendoi se “Putini synon të pushtojë gjithë Ukrainën dhe të rimarrë pjesë të Evropës që i përkisnin ish-perandorisë sovjetike”, duke cituar burime anonime që dyshohet se janë “të njohura me inteligjencën amerikane”.
“Jo, kjo është një gënjeshtër dhe propagandë që Reuters po e shtyn me dëshirë në emër të luftënxitësve që duan të minojnë përpjekjet e palodhura të Presidentit Trump për t’i dhënë fund kësaj lufte të përgjakshme që ka çuar në më shumë se një milion viktima në të dyja anët,” u përgjigj Gabbard në një postim në X.
Në mënyrë të rrezikshme, ju po promovoni këtë narrativë të rreme për të bllokuar përpjekjet e paqes të Presidentit Trump dhe për të nxitur histeri e frikë te njerëzit, që t’i bëni ata të mbështesin përshkallëzimin e luftës, që është ajo që NATO dhe BE duan vërtet me qëllim që të tërheqin ushtrinë e Shteteve të Bashkuara drejtpërdrejt në luftë me Rusinë.
Sipas Gabbard, vlerësimet e inteligjencës amerikane tregojnë përkundrazi se Rusia “kërkon të shmangë një luftë më të gjerë me NATO-n” dhe i mungon kapaciteti për të bërë një të tillë edhe nëse do donte, shkruan Rt.
Moska këmbëngul se po mbron qytetarët e saj në konfliktin e Ukrainës dhe ka akuzuar NATO-n për provokimin e armiqësive dhe nxjerrjen nga shinat të nismave të paqes të mbështetura nga SHBA. Putin, i cili ka mohuar çdo qëllim për të rikthyer Bashkimin Sovjetik, ka akuzuar vendet e NATO-s se po “përgatiten për një luftë të madhe” duke ndërtuar dhe modernizuar forcat sulmuese, ndërsa “u shpëlajnë trurin” popullatave të tyre me pretendimet se një përplasje me Rusinë është e pashmangshme.
