Gjykata e Lartë e Shteteve të Bashkuara vendosi të mërkurën që Lisa Cook të mbetet përkohësisht në detyrën e saj si guvernatore e Rezervës Federale, duke refuzuar të veprojë menjëherë ndaj kërkesës së administratës Trump për ta shkarkuar nga bordi i bankës qendrore.
Në një urdhër të shkurtër e të panënshkruar, gjykata tha se do të shqyrtojë argumentet në janar lidhur me përpjekjen e presidentit Donald Trump për ta larguar Cook nga detyra.
Çështja lidhet me kompetencën e presidentit për të shkarkuar zyrtarë të pavarur federalë dhe me kufizimet ligjore që gjykatat mund të vendosin ndaj këtyre shkarkimeve.
Administrata Trump kishte kërkuar që Cook të shkarkohej para mbledhjes së shtatorit të Fed-it për normat e interesit, por një gjykatëse federale e cilësoi veprimin të paligjshëm. Një gjykatë apeli në Uashington, me shumicë 2-1, hodhi poshtë edhe ankimimin urgjent të administratës.
Presidenti Trump ka akuzuar Cook për mashtrim hipotekor, duke pretenduar se ajo kishte deklaruar dy prona, një në Miçigan dhe një në Xhorxhia, si banesa kryesore në vitin 2021, para se të bëhej pjesë e bordit të Fed-it.
“Presidenti mund të përcaktojë me arsye se normat e interesit që paguajnë qytetarët amerikanë nuk duhet të vendosen nga një guvernatore që ka gënjyer për të siguruar përfitime financiare personale,” shkroi Prokurori i Përgjithshëm, D. John Sauer, në kërkesën përpara Gjykatës së Lartë.
Nga ana tjetër, Cook ka mohuar çdo shkelje ligjore dhe nuk është akuzuar për ndonjë krim.
Dokumentet e siguruara nga Associated Press tregojnë se ajo e kishte përshkruar apartamentin në Atlanta si “shtëpi pushimi” në një dokument kredie dhe si “shtëpi të dytë” në një aplikim për siguri.
Të dyja këto, sipas avokatëve të saj, rrëzojnë pretendimet e administratës.
Avokati i saj, Abbe Lowell, deklaroi se Cook “do të vazhdojë të kryejë detyrat e saj si një guvernatore e konfirmuar nga Senati” dhe se ajo nuk do të lejojë të “shantazhohet nga Trump”.
Edhe vetë Cook është shprehur se nuk ka ndërmend të japë dorëheqjen dhe nuk do të lejojë të “detyrohet të largohet në kundërshtim me ligjin”.
Gjykata e Lartë pritet të vendosë në fillim të vitit 2026 nëse Trump ka autoritet për ta shkarkuar atë. Ndërkohë, Cook pritet të marrë pjesë në mbledhjen e radhës të komitetit të normave të interesit më 28-29 tetor, ku do të ketë të drejtën e votës.
