Donald Trump i ka kërkuar BE-së të vendosë tarifa deri në 100 për qind ndaj Indisë dhe Kinës, si pjesë e një përpjekjeje të përbashkët për të rritur presionin ndaj Rusisë për t’i dhënë fund luftës së saj në Ukrainë, sipas tre zyrtarëve të njohur me çështjen.
Presidenti e bëri kërkesën e jashtëzakonshme pas një bisede telefonike midis zyrtarëve të lartë të SHBA-së dhe BE-së të mbledhur në Uashington për të diskutuar mënyrat për të rritur koston ekonomike të luftës për Moskën.
“Ne jemi gati t’i hyjmë kësaj tani, por do ta bëjmë këtë vetëm nëse partnerët tanë evropianë na mbështesin”, tha një zyrtar amerikan.
Një zyrtar i dytë amerikan tha se Uashingtoni ishte i përgatitur të “pasqyronte” çdo tarifë ndaj Kinës dhe Indisë të vendosur nga BE-ja, duke çuar potencialisht në një rritje të mëtejshme të taksave amerikane mbi importet nga të dy vendet.
Propozimi i Trump vjen mes zemërimit brenda Shtëpisë së Bardhë për vështirësinë e ndërmjetësimit të një marrëveshjeje paqeje dhe sulmeve ajrore gjithnjë e më agresive të Rusisë ndaj Ukrainës.
“Presidenti erdhi këtë mëngjes dhe pikëpamja e tij është se duhet të vendosim të gjithë tarifa të rënda dhe t’i mbajmë tarifat në fuqi derisa kinezët të bien dakord të ndalojnë blerjen e naftës. Nuk ka shumë vende të tjera ku mund të shkojë nafta”, tha zyrtari i parë amerikan.
Trump më vonë të martën u tha gazetarëve se priste të kishte një telefonatë me presidentin rus Putin “këtë javë ose në fillim të javës tjetër”.
Lëvizja e Trump vjen pasi presidenti kinez Jinping, Putin dhe kryeministri Indian Narendra Modi forcuan lidhjet e tyre në një samit javën e kaluar.
SHBA-të muajin e kaluar rritën tarifat për importet indiane në 50 për qind për shkak të blerjeve të naftës ruse nga vendi, duke rritur tensionet me kombin e Azisë Jugore.
Të martën në mbrëmje, Trump shkroi në Truth Social se negociatat tregtare me Indinë do vijonin dhe sugjeroi se ato do kishin një “përfundim të suksesshëm”.
“India dhe Shtetet e Bashkuara të Amerikës po vazhdojnë negociatat për të adresuar pengesat tregtare midis dy kombeve tona. Pres me padurim të flas me mikun tim shumë të mirë, kryeministrin Modi, në javët e ardhshme”, shkroi ai.
Uashingtoni nuk e ka shënjestruar konkretisht Kinën për shkak të blerjeve të saj të naftës ruse. Në prill, Trump rriti ndjeshëm tarifat mbi importet kineze, por i uli ato në maj pas një reagimi të ashpër të tregut.
Zyrtarët e BE-së, të udhëhequr nga shefi i sanksioneve të bllokut, David O’Sullivan, morën pjesë në diskutimet në Uashington, ku morën pjesë zyrtarë të lartë të Thesarit të SHBA-së.
Kryeqytetet evropiane po diskutonin sanksione të mundshme dytësore kundër vendeve si Kina dhe India për blerjen e naftës dhe gazit rus, thanë zyrtarët për Financial Times këtë javë, por shumë prej tyre janë nervozë duke pasur parasysh marrëdhëniet tregtare të BE-së me Pekinin dhe Nju Delhin.
Diplomatët amerikanë në Evropë u kanë theksuar kryeqyteteve të BE-së se administrata Trump nuk është e gatshme të vendosë masa ndëshkuese ndaj blerësve të naftës dhe gazit rus pa pjesëmarrjen e BE-së. Disa vende evropiane gjithashtu vijojnë të blejnë produkte energjetike ruse për veten e tyre.
“Është një pyetje, a kanë evropianët vullnetin politik për ta çuar luftën në një fund?” tha zyrtari i parë amerikan, duke shtuar: “Çdo gjë nga këto sigurisht që do jetë e kushtueshme, dhe që presidenti ta bëjë këtë, ne kemi nevojë për partnerët tanë të BE-së dhe idealisht të gjithë partnerët tanë me ne. Dhe ne do ta ndajmë dhimbjen së bashku.”
