Japonia ka regjistruar një nga rëniet më të thella të popullsisë në historinë moderne, me gati një milion më shumë vdekje sesa lindje gjatë vitit 2024 – shifra më e lartë që nga fillimi i regjistrimeve zyrtare në vitin 1968, përcjell BBC.
Sipas të dhënave të publikuara nga Ministria e Punëve të Brendshme dhe Komunikimeve, numri i qytetarëve japonezë ra me 908,574 persona vitin e kaluar. Në total, vendi regjistroi 686,061 lindje – niveli më i ulët që nga viti 1899 – ndërkohë që numri i vdekjeve arriti në gati 1.6 milionë.
Kjo përbën vitin e 16-të radhazi me rënie të popullsisë dhe po ushtron presion të madh mbi sistemin e pensioneve dhe shëndetësisë.
Kryeministri Shigeru Ishiba e ka quajtur këtë krizë demografike një “emergjencë e heshtur”, duke premtuar politika më miqësore për familjet, si çerdhe falas dhe orare pune më fleksibël. Megjithatë, përpjekjet për të rritur shkallën e lindshmërisë në vend nuk kanë sjellë rezultatet e pritura.
Në fillim të vitit 2025, popullsia totale e Japonisë zbriti në rreth 124.3 milionë, një ulje prej 0.44% krahasuar me vitin e mëparshëm. Ndërkohë, numri i banorëve të huaj arriti nivelin më të lartë historik prej 3.6 milionë persona, që përfaqëson rreth 3% të popullsisë.
Për të zbutur mungesën e fuqisë punëtore, qeveria ka nisur nisma për të tërhequr punëtorë të huaj, përfshirë një vizë për nomadë digjitalë dhe programe trajnimi, megjithëse emigracioni mbetet temë e ndjeshme në një shoqëri me prirje konservatore.
Ndërkohë, popullsia në moshë të tretë – mbi 65 vjeç – përbën tani gati 30% të popullsisë totale, përqindja e dytë më e lartë në botë pas Monakos, sipas të dhënave të Bankës Botërore. Ndërsa grupmosha në moshë pune (15-64 vjeç) është tkurrur në rreth 60%.
Qytetet e vogla dhe fshatrat po përjetojnë boshatisje të vazhdueshme, ndërsa mbi katër milionë shtëpi janë braktisur gjatë dy dekadave të fundit.
Arsyet e rënies së lindshmërisë përfshijnë kostot e larta të jetesës, pagat e stagnuara dhe një kulturë pune tepër e ngurtë. Gratë përballen me role të thella gjinore dhe mungesë mbështetjeje si kujdestare kryesore në familje.
Shkalla e fertilitetit në Japoni – numri mesatar i fëmijëve që lind një grua gjatë jetës së saj – ka qenë e ulët që prej viteve 1970. Ekspertët paralajmërojnë se edhe me përmirësime të mëdha, do të duhen dekada që efektet të ndihen në mënyrë të ndjeshme.
