Një takim mes delegacioneve izraelite dhe siriane është zhvilluar këtë javë në Paris, me ndërmjetësimin e Shteteve të Bashkuara, në përpjekje për të arritur një marrëveshje sigurie mes palëve. Megjithëse bisedimet janë përshkruar nga burime diplomatike si “të ndershme dhe të përgjegjshme”, ato përfunduan pa arritur një marrëveshje konkrete, përcjell YNetNews.
Në diskutime morën pjesë Ministri izraelit i Çështjeve Strategjike, Ron Dermer, Këshilltari i Sigurisë Kombëtare, Tzachi Hanegbi, dhe Ministri i Jashtëm sirian, Asaad al-Shaibani. Ndërmjetës ishte Ambasadori amerikan dhe i Dërguari i Posaçëm për Sirinë, Tom Barrack, i cili deklaroi se takimi kontribuoi në hapjen e një dialogu të drejtpërdrejtë dhe në uljen e tensioneve.
Bisedimet u fokusuan kryesisht në:
Sigurimin e stabilitetit përgjatë kufirit izraelito-sirian
Të ardhmen e provincës së Sweidës, e banuar kryesisht nga komuniteti druze
Mundësinë për të ringjallur marrëveshjen e vitit 1974 për çmilitarizimin e zonës së ndarjes mes dy vendeve
Takimi vjen në një kohë kur dhuna është rritur në jug të Sirisë, veçanërisht në zonat pranë kufirit me Izraelin. Një raund i ri bisedimesh pritet të zhvillohet së shpejti, ndërsa Uashingtoni synon të ruajë rolin e tij si ndërmjetës në uljen e tensioneve në rajon.
