Në përmbyllje të legjislaturës së dhjetë parlamentare, deputeti demokrat Gazment Bardhi komentoi situatën aktuale brenda Partisë Demokratike dhe rolin e tij gjatë një prej periudhave më të vështira që ka kaluar kjo forcë politike. Gjatë një interviste për Report Tv, Bardhi u shpreh se pavarësisht përplasjes mes palëve, ai vlerëson kontributin e kolegëve të tij, të cilët nuk do të jenë më pjesë e parlamentit në shtator.
“Secili prej kolegëve që nuk do të jetë më në parlament, pavarësisht në cilin krah kanë qenë, ka dhënë një kontribut të vyer. Kanë qenë zëra të fuqishëm dhe do të jenë një mungesë e rëndësishme për forcën e grupit parlamentar. Edhe eksperienca e tyre e gjatë është një element pozitiv për partinë,” tha Bardhi.
Pas largimit të Lulzim Bashës, Bardhi mori një rol më të dukshëm në drejtimin e grupit parlamentar, duke u pozicionuar në funksion të zhvillimeve të brendshme në PD. Në vijim të ndryshimeve, pjesa më e madhe e deputetëve që e mbështetën nuk do të jenë më në Kuvend, ndërkohë që drejtimi i grupit i kalon për diskutim zhvillimeve të ardhshme politike dhe vendimmarrjes së lidershipit.
Duke komentuar rezultatin zgjedhor dhe situatën në degën e Fierit, ku ai ishte drejtues politik, Bardhi nuk dha një përgjigje të qartë nëse do të vazhdojë të udhëheqë grupin parlamentar pas shtatorit. “Është gjëja e fundit që mendoj në këto momente. Aktualisht jemi të fokusuar te ajo që ndodhi më 11 maj,” u shpreh ai.
Lidhur me përbërjen e re të Kuvendit, Bardhi komentoi edhe ndryshimet në radhët e Partisë Socialiste, duke e cilësuar si problematik faktin që, sipas tij, niveli i debatit politik është ulur. Duke iu referuar një prej deputetëve të rinj të mazhorancës, ai tha se përfaqësimi politik nuk duhet të reduktohet në personalizime apo retorikë vulgare.
Sa i përket mundësisë për dialog mes PD-së dhe PS-së në legjislaturën e re për çështje si rregullat zgjedhore, Bardhi la të kuptohet se çështja mbetet për t’u diskutuar në të ardhmen, pa dhënë një qëndrim të prerë në këtë fazë.
