IDF tha të premten në mbrëmje se Forcat Ajrore përfunduan sulmet ndaj objektit bërthamor të Iranit në zonën e Isfahanit.
“Vendi kryen një proces rikonvertimi të uraniumit të pasuruar. Kjo është faza tjetër pas pasurimit të uraniumit në procesin e prodhimit të armëve bërthamore.”
“Sulmi shkatërroi një strukturë për prodhimin e uraniumit metalik, infrastrukturën për konvertimin e uraniumit të pasuruar, laboratorët dhe infrastrukturën shtesë”, tha zëdhënësi i Gjeneral Brigade Ephraim Dafrin.
IDF paralajmëroi të premten në mbrëmje se Izraeli do përballet me atë që mund të jetë një sulm i madh iranian me raketa dhe dronë, pasi Izraeli të kryejë sulme kundër objekteve dhe personelit bërthamor dhe ushtarak të Iranit.
Njësia e Zëdhënësit të IDF lëshoi të premten një paralajmërim përpara një sulmi të pritshëm me raketa. Ushtria identifikoi një lëshim nga Jemeni që synonte zonën e Jerusalemit dhe Bregun Perëndimor. Sirena u dëgjuan në gjithë zonën disa minuta pas njoftimit të ushtrisë.
Ushtria më vonë raportoi se raketa ra në qytetin e Hebronit, i cili ndodhet në Bregun Perëndimor, pasi nuk u lëshuan raketa interceptuese kundër kërcënimit shkruan Ynet.
“Një raketë e lëshuar nga Jemeni ra në zonën e Hebronit, nuk u lëshuan raketa interceptuese. Hollësitë e incidentit janë duke u shqyrtuar.”
Njësia e Zëdhënësit të Forcave të Armatosura të Izraelit raportoi të premten se Forcat Ajrore Izraelite vijojnë të sulmojnë sistemet e lëshimit të raketave dhe infrastrukturën e dronëve në gjithë Iranin. Operacioni ka vijuar për 16 orë. New York Times dhe agjencia e lajmeve Fars e Iranit raportuan se sulmet kishin në shënjestër edhe Fordow, një strukturë bërthamore e fortifikuar e ndërtuar në një shpat mali pranë Qom.
Shefi i Shtabit të IDF-së, gjenerallejtënant Eyal Zamir, mbajti një vlerësim të situatës mbi operacionin, duke thënë: “Ne po vijojmë me dy përpjekjet kryesore që kemi vendosur për veten tonë – përpjekjet mbrojtëse dhe ato ofensive. I kujtoj të gjithëve se po përballemi me një armik të rrezikshëm dhe kompleks dhe duhet të ruajmë një nivel shumë të lartë gatishmërie.”
“Do ketë momente të vështira; duhet të jemi të përgatitur për gamën e skenarëve që kemi planifikuar, kërkohet gatishmëri dhe disiplinë shumë e lartë në frontin e brendshëm.”
Kanali Al Hadath i Arabisë Saudite raportoi të premten se Shtetet e Bashkuara informuan qeverinë irakiane se do reagonin drejtpërdrejt nëse ndonjë interes amerikan do sulmohej nga milicitë irakiane pro-iraniane. Burimet i thanë medias se forcat amerikane në bazën Ain al-Assad në Irakun Perëndimor qëlluan tre dronë sulmues në zonë. Mediat iraniane shtuan më vonë se shpërthime u dëgjuan në qendër të qytetit të Teheranit.
