Javën e kaluar Amazon njoftoi planet për të nxjerrë një dokumentar “prapa skenave” për Melania Trump, prodhuar nga vetë zonja e parë e SHBA-së. Gjiganti i teknologjisë thuhet se pagoi 40 milionë dollarë për marrëveshjen ekskluzive vetëm disa javë pasi dhuroi 1 milionë dollarë për komitetin e inaugurimit të bashkëshortit të saj Donald Trump dhe u angazhua për transmetimin e drejtpërdrejtë të ceremonisë në shërbimin e saj Prime.
Përpara zgjedhjeve presidenciale të nëntorit, themeluesi i Amazon, Jeff Bezos, anuloi gjithashtu planet e The Washington Post, që ai zotëron, për të mbështetur Kamala Harris, rivalen demokrate të Trump. Menjëherë pas zgjedhjeve, ai foli pozitivisht për “energjinë e Trump rreth zbutjes së rregulloreve” dhe bëri një pelegrinazh personal për të darkuar me presidentin e ardhshëm në rezidencën e tij në Mar-a-Lago.
Nxitimi i Bezos për të rregulluar punët me Trump-ët është ndjekur nga drejtuesit e korporatave në gjithë Amerikën, pasi miliarderët e teknologjisë, financuesit dhe drejtuesit e disa prej grupeve më të njohura të konsumatorëve në SHBA nxitojnë të kapin “ritmin” më konservator në vazhdën e fitores së Trump-it në zgjedhje dhe fitoren dërrmuese republikane në dy dhomave të Kongresit.
Në një pasqyrim të nxitimit të korporatave në vitin 2020 për të mbështetur kauzat e drejtësisë sociale pas vrasjes së George Floyd nga një polic, kompanitë sot po riformulojnë mënyrën se si ndërveprojnë me klientët e tyre, punonjësit dhe shoqërinë në përgjithësi.
Disa nga lëvizjet, të tilla si parada e shefave që vizituan Trump-in në Florida, donacionet dhe përpjekja për të bërë biznes me njerëzit në rrethin e tij të ngushtë, duket se janë krijuar për të fituar favoret e presidentit, i njohur për kritikat ndaj kompanive dhe drejtuesve që nuk i pëlqen.
Rezidenca e Trump në Mar-a-Lago
Por zgjedhjet kanë përshpejtuar gjithashtu një zhvendosje më të gjerë në qëndrime më konservatore sociale dhe politike dhe një përqafim të kapitalizmit.
Kompanitë po heqin shumëllojshmërinë, barazinë dhe departamentet e përfshirjes, duke shkurtuar mbështetjen e tyre për bamirësitë e shumëllojshmërisë racore dhe po braktisin grupet e ndryshimeve klimatike. Ata po fshijnë gjithashtu çdo gjë që mund të perceptohet si “woke” nga deklaratat publike, dokumentet e korporatës dhe reklamat.
Zgjedhjet kanë fuqizuar disa drejtues të lartë që të fillojnë të flasin në favor të politikave konservatore, nga ulja e taksave te rolet tradicionale gjinore.
“Ka presione konservatore në këtë klimë politike dhe njerëzit thjesht po parashikojnë një ndryshim në administratë dhe janë duke përafruar strategjitë e tyre me këto ndryshime të pritshme të politikave, “ tha një ish-ekzekutiv i “DEI” në “Goldman Sachs”, Trier Bryant dhe X.
Javën e kaluar, grupi i rrjeteve sociale META dha shembullin e të gjitha zhvillimeve njëherësh. Ajo hoqi politikat e saj të moderimit të përmbajtjes, shtoi në bordin e saj mikun e vjetër të Trump dhe shefin ekzekutiv të “Ultimate Fighting Championship”, Dana White, zhvendosi shefin e saj të shumëlloshmërisë në një rol të ri dhe hoqi dorë nga synimet për të rritur shumëllojshmërinë racore dhe gjinore mes menaxherëve dhe furnizuesve të tij.
Themeluesi Mark Zuckerberg më vonë iu bashkua një podcasti të organizuar nga Joe Rogan, i cili mbështeti Trump-in në zgjedhje dhe u ankua për rritjen e kompanive “të sterilizuara kulturalisht”.
Mark Zuckerberg, majtas, podkasteri Joe Rogan djathtas
Politikanët liberalë dhe aktivistët e investitorëve janë të tmerruar.
“Shpejtimi i korporatave drejt Trump-it është thellësisht shqetësuese,” tha Brad Lander, kontrollor i qytetit të Nju Jorkut dhe një avokat për investime të qëndrueshme.
“Ne kemi parë shumë shembuj gjatë historisë. Kështu, me kalimin e kohës, dobësohen demokracia dhe të drejtat themelore”.
Por kompanitë, drejtuesit dhe analistët pretendojnë se motivet që nxisin ndryshimet janë të nërlikuara dhe pasqyrojnë shumë më tepër sesa një dëshirë për të përkëdhelur presidentin e ardhshëm.
Gjendja midis klientëve të tyre ka ndryshuar, argumentojnë drejtuesit, dhe vendimet e gjykatave dhe hetimet rregullatore shtetërore dhe federale, veçanërisht vendimi i Gjykatës së Lartë të SHBA-së të vitit të kaluar që nxjerr jashtë ligjit veprimin afirmativ në kolegje, kanë dëmtuar bazën e programeve të lamrishmërisë dhe klimës.
Për shumë njerëz, administrata e re ofron një mundësi të mirëpritur për të hequr disa nga rregullat më të rrepta të miratuara gjatë administratës së Presidentit Joe Biden dhe për të përkulur politikën tatimore dhe rregullatore në favor të tyre.
David Solomon, shefi ekzekutiv i “Goldman Sachs”, së fundmi lavdëroi administratën e ardhshme të Trump për “drejtimin e një kursi të ri të rritjes”.
“Unë jam mjaft optimist se kjo administratë do drejtojë një axhendë shumë pro-rritjes,” tha Solomon, shkruan Reuters.
Udhëheqësit e teknologjisë kanë bërë disa nga gjestet e profilit më të lartë ndaj Trump dhe vlerave konservatore, në një përpjekje parandaluese për të ndrequr marrëdhëniet.
Tim Cook i Apple, Sundar Pichai i Google dhe Sam Altman i OpenAI, të gjithë iu bashkuan Zuckerberg-ut të META-s dhe Bezos të Amazon në premtimin e 1 milion dollarëve për fondin e inaugurimit të Trump, dhe Pichai gjithashtu fluturoi në Mar-a-Lago. Trump më parë pretendoi se Google ishte “mashtruar” për të fshehur mbulimin pozitiv rreth tij.
Sam Altman, shefi ekzekutiv i OpenAI
“Është një deklaratë e mungesës së besimit dhe shtyllës kurrizore të drejtuesve të teknologjisë,” tha Jeffrey Sonnenfeld, bashkëpunëtor i lartë e Dekan për studimet e lidershipit në Shkollën e Menaxhimit të Yale. Ai përshkroi se kontributet e tyre në betimin e Trump shërbejnë si një “skemë përfitimi” për presidentin e zgjedhur.
Në sektorin financiar, ndryshimi më i dukshëm që nga zgjedhja e Trump ka qenë rreth ndryshimeve klimatike. Të gjitha bankat kryesore të Wall Street dhe disa menaxherë të mëdhenj të parave janë larguar nga grupet e industrisë që kërkojnë të përdorin ndikimin e tyre financiar për të ulur emetimet e karbonit.
BlackRock, objektivi i hetimeve dhe padive konservatore shtetërore mbi mbështetjen e tij paraprake për investime të qëndrueshme, përmendi në mënyrë të qartë çështje ligjore dhe rregullatore për largimin e saj nga nisma e Menaxherëve të Aseteve Neto Zero javën e kaluar.
Edhe mënyra se si njerëzit në Wall Street flasin dhe ndërveprojnë po ndryshon. Bankierët dhe financierët thonë se fitorja e Trump i ka trimëruar ata që u mërzitën me “doktrinën woke” dhe mendonin se duhej të vetëcensuroheshin ose të ndryshonin gjuhën e tyre për të shmangur ofendimin e kolegëve të rinj, grave, pakicave ose personave me aftësi të kufizuara.
“Ndihem i çliruar,” tha një bankier i lartë.
Të tjerë në Wall Street ndihen gjithashtu të çliruar për të përqafuar qëndrimet e tyre, pa rrezikuar kundërpërgjigjen nga organizatat që pretendojnë se mbrojnë kauzat e ndryshme.
“Shumica prej nesh nuk duhet të puthin b*then e atyre që kanë ushtruar presion deri tani sepse, ashtu si Trump, ne e duam Amerikën dhe kapitalizmin,” tha njëri.
Ndërkohë, grupet që ballafaqohen me konsumatorët janë bërë gjithnjë e më të kujdesshëm për të shmangur shfaqjen e “woke”.
Por zhvendosja djathtas ka qenë aq e shpejtë sa disa grupe janë kapur gafil. Pas sulmit të fundit terrorist në Neë Orleans, shefi ekzekutiv i grupit të sigurimeve “Allstate”, Tom Wilson, tërhoqi një stuhi kritikash pasi tha se “ne duhet të jemi më të fortë së bashku duke kapërcyer përçarjen dhe negativitetin”.
Aktivistët konservatorë akuzuan Wilson, kompania e të cilit po sponsorizonte një ekip të profilit të lartë të futbollit amerikan, për minimizimin e vrasjeve duke nxitur kauza progresive.
“Allstate” u përpoq të shpjegonte se deklarata “pasqyron një angazhim më të gjerë për të nxitur besimin dhe pozitivitetin në komunitetet në mbarë vendin”.
Jeff Bezos dhe e fejuara e tij Lauren Sánchez
Ndryshimi tjetër i madh i korporatës ka qenë në përpjekjet e DEI-së, veçanërisht që nga vendimi i Gjykatës së Lartë. Kompanitë përfshirë Harley-Davidson, Ford dhe Molson Coors filluan të rikthejnë diversitetin e tyre të korporatës në muajt pas vendimi, dhe rrjedhja u kthye në përmbytje pas fitores së Trump-it në zgjedhje.
Ëalmart ndaloi së konsideruari racën dhe gjininë në dhënien e kontratave të furnizuesve, përfundoi trajnimin për barazi racore për stafin dhe nuk do rinovojë fondet për Qendrën për Barazi Racore, të cilën e ngriti me një zotim 100 milionë dollarë pas protestave lidhur me vrasjen e George Floyd. McDonald’s javën e kaluar hoqi objektivat e përqindjes për gratë dhe menaxherët jo të bardhë, pushoi së kërkuari nga furnitorët që të nënshkruanin një premtim të DEI dhe tha se tani do t’i referohej ekipit të tij të diversitetit si një Ekip Global i Përfshirjes.
Të dyja kompanitë vunë në dukje çështje ligjore, por edhe ndryshim të rrethanave. McDonald’s përmendi “një peizazh në zhvillim”, ndërsa tha se ishte i përkushtuar ndaj gjithëpërfshirjes. Walmart tha se qasja e saj e ndryshimit tregoi se “sne jemi të gatshëm të ndryshojmë së bashku me bashkëpunëtorët dhe klientët tanë që përfaqësojnë të gjithë Amerikën. Ne kemi qenë në një udhëtim dhe e dimë se nuk jemi perfekt, por çdo vendim vjen nga një vend i dëshirës për të nxitur një ndjenjë përkatësie.”
Konsulentët dhe këshilltarët e tjerë të korporatave thanë se ndryshimi i peizazhit u kishte dhënë gjithashtu kompanive një mënyrë për të rimenduar ose hequr qëllimet mjedisore dhe të diversitetit që nuk po i përmbushnin gjithsesi.
“Ata nuk duan të kapen duke premtuar dhe duke mos dhënë”, tha Richard Edelman, i cili këshillon drejtuesit e korporatave si shef ekzekutiv i Edelman, një grup i marrëdhënieve me publikun.
“Kompanitë janë ende të përkushtuara ndaj diversitetit dhe janë të përkushtuara ndaj gjithëpërfshirjes, ato thjesht nuk duan të garantojnë rezultate.”
Nuk është e qartë nëse kthesa konservatore do zgjasë më shumë sesa pozicionet progresive të paraqitura nga kompanitë në vitin 2020. Bryant, ish-ekzekutivi i DEI-së që tani është shefi ekzekutiv i firmës konsulente Pathfinder, tha se shumë nga ndryshimet e politikave dukej se synonin zbutjen e kontrollit politik dhe jo ndryshimet thelbësore të politikave.
VINI RE: Ky material është pronësi intelektuale e Financial Times
Përgatiti për Hashtag.al, Klodian Manjani
