Vendosni fjalën kyçe....

Policia turke arreston 70 persona të dyshuar për lidhje me Shtetitn Islamik


Policia turke arrestoi 70 persona të dyshuar si të lidhur me grupin e armatosur të Shtetit Islamik (IS) në bastisjet në të gjithë vendin gjatë javës, tha të enjten Ministri i Brendshëm Ali Jerlikaya.

Jerlikaya njoftoi se sasi të mëdha parash, materiale dixhitale dhe fatura për transaksione bankare “Hawala” – një sistem informal i transferimit të parave në disa pjesë të botës myslimane, u zbuluan gjatë kontrolleve, sipas mediave.

Në fund të dhjetorit, forcat turke të sigurisë arrestuan 32 persona të dyshuar si anëtarë të IS-it, të cilët, sipas mediave vendase, dyshohet se po planifikonin sulme në sinagoga, kisha dhe ambasadën e Irakut.

Një javë më parë, policia arrestoi 304 luftëtarë të dyshuar të IS në të gjithë Turqinë në atë që dukej të ishte një goditje sigurie përpara festimeve të Vitit të Ri.

Grupi i Shtetit Islamik ka kryer një sërë sulmesh vdekjeprurëse në Turqi gjatë dekadës së fundit, duke përfshirë një sulm me armë në një klub nate në Stamboll më 1 janar 2017, i cili vrau 39 njerëz dhe një bombë gjatë Marshimit të Paqes në Ankara në tetor 2015 që vrau 105 persona.