Rriten kërkesat për kredi/ Biznesi i madh dhe individët kërkojnë më shumë, bankat tregojnë kujdes

Bankat po tregohen më të kujdesshme duke refuzuar, por kërkesa e individëve dhe bizneseve për kredi vijoi të rritej gjatë tremujorit të dytë.

Banka e Shqipërisë në vrojtimin që i ka bërë aktivitetit kreditues shprehet se shkalla e refuzimit të kredive si për bizneset dhe individët u rrit gjatë tremujorit të dytë. Për bizneset arsyet e refuzimit u ndikuan nga të ardhurat nga ushtrimi i aktivitetit, rritja e perceptimit të rrezikut për gjendjen e tyre financiare si dhe statusin e kredive aktuale.

Për individët ndërkohë refuzimet erdhën për shkak të historikut të kreditit për individët, të tilla si historiku i marrëdhënieve me bankën dhe historiku nga regjistri i kredive. Po ashtu, të ardhurat e disponueshme ishin një tjetër faktor.

Bizneset e mëdha kishin kërkesë më të lartë për kredi, kryesisht për mbulimin e nevojave për likuiditet, ndërsa më e ulët ishte kërkesa te bizneset e vogla dhe të mesme.

Ndërkohë, individët kanë vijuar të rrisin kërkesën e tyre nxitur kryesisht nga kredia për banesë. Por, edhe kredia konsumatore erdhi gjithashtu në rritje.

Edhe pse rritja e normave të interesit dhe inflacionit e ka ngadalësuar disi aktivitetin kreditues, mjedisi ekonomik vijon të mbetet mbështetës.

VINI RE: Ky material është pronësi intelektual e Top Channel