Bashkimi Evropian ka propozuar standarde e reja të ndotjes për automjetet e reja me motor me djegie.
Të ashtuquajturat standarde Euro 7 të paraqitura nga Komisioni Evropian do të zbatohen për të gjitha makinat, furgonët, kamionët dhe autobusët që shiten në BE, me qëllim uljen e emetimeve nga tubacionet e gazit, frenat dhe gomat.
Zyrtarët e BE-së thanë se udhëzimet pritej të ulnin emetimet e oksidit të azotit nga makinat dhe furgonat me 35% krahasuar me rregulloret ekzistuese të emetimit të shkarkimeve për ndotës të ndryshëm nga dyoksidi i karbonit, dhe me 56% nga autobusët dhe kamionët.
Standardet e vendosura synojnë të plotësojnë rregullat e BE-së për ndryshimet klimatike për dyoksidin e karbonit dhe mbulojnë gjithashtu ndotësit e dëmshëm të emetuar nga tubacionet e automjeteve, frenat dhe gomat, duke përfshirë grimcat ultrafine, hidrokarburet dhe monoksidin e karbonit.
Propozimi do t’i paraqitet Parlamentit Evropian dhe vendeve anëtare të BE-së me qëllim që udhëzimet të hyjnë në fuqi në korrik 2025 për makinat dhe furgonët dhe korrik 2027 për automjetet e rënda.
Shoqata Evropiane e Prodhuesve të Automobilave ishte skeptike në lidhje me datat e zbatimit dhe tha se propozimi rrezikon të ngadalësojë tranzicionin në transport me zero emetime.
Grupi tha se standardet aktuale për ndotësit ishin të rrepta dhe argumentoi se emetimet e shkarkimeve janë “në një nivel mezi të matshëm falë teknologjisë së fundit të automjeteve”.
“Për fat të keq, përfitimi mjedisor i propozimit të komisionit është shumë i kufizuar, ndërsa rrit shumë koston e automjeteve”, tha shoqata.
Komisioni Evropian tha se standardet e reja mund të përmbushen me teknologjitë ekzistuese dhe pa prekur blerësit e automjeteve.
Ligjvënësit e BE-së dhe vendet anëtare arritën një marrëveshje muajin e kaluar për të ndaluar shitjen e makinave dhe furgonëve të rinj me benzinë dhe naftë deri në vitin 2035.
Sipas marrëveshjes, prodhuesve të makinave do t’u kërkohet të reduktojnë emetimet e makinave të reja të shitura me 55% në vitin 2030, krahasuar me vitin 2021, përpara se të arrijnë një ulje prej 100% pesë vjet më vonë.
BE-ja beson se futja e normave të reja të ndotjes për gjeneratën e fundit të motorëve me djegie është thelbësore sepse automjetet që hyjnë në treg përpara afatit të 2035 do të qëndrojnë në shërbim për vite me radhë.
