Prokurori i Përgjithshëm i Nju Jorkut po heton nëse Organizata Trump ka fryrë vlerat e pasurive të paluajtshme për të marrë kredi të favorshme. Trump e ka quajtur hetimin një “gjueti shtrigash”.
Ish-presidenti amerikan Donald Trump tha se ai refuzoi të dëshmonte në një hetim civil mbi praktikat e biznesit të familjes së tij të mërkurën pasi u paraqit në zyrën e Prokurorit të Përgjithshëm të Nju Jorkut.
“Unë nuk pranova t’u përgjigjem pyetjeve në bazë të të drejtave dhe privilegjeve që i jepen çdo qytetari sipas Kushtetutës së Shteteve të Bashkuara,” tha Trump, duke shtuar se ai nuk kishte “zgjidhje tjetër” veçse të thërriste amendamentin e pestë, i cili lejon mbrojtjen nga vetë-inkriminimi.
Për çfarë është hetimi?
Prokurorja e Përgjithshme e Shtetit të Nju Jorkut, Letitia James po shqyrton nëse Organizata Trump ka fryrë vlerat e pasurive të paluajtshme.
Trump dhe fëmijët e tij më të mëdhenj, Donald Trump Jr. dhe Ivanka Trump, humbën një betejë ligjore për t’u paraqitur për dëshmi. Trump tha të martën në faqen e tij të mediave sociale, Truth Social, se do të paraqitej në zyrën e Prokurorit të Përgjithshëm.
Donald Jr dhe Ivanka, duhej të dëshmonin nën betim në korrik, por depozitimet u shtynë për shkak të vdekjes së gruas së parë të Trump.
James tha se hetimi i saj zbuloi prova të rëndësishme se Organizata Trump mbivlerësoi vlerat e aseteve për të marrë kredi të favorshme dhe i nënvlerësoi ato për lehtësime tatimore.
Në fillim të këtij viti, Trump u përbuz nga një gjykatës i Nju Jorkut për dështimin në dorëzimin e dokumenteve që u kërkuan si pjesë e hetimit.
Trump thotë se po “sulmohet nga të gjitha anët”
Trump ka mohuar shkeljen dhe e ka quajtur hetimin “gjuetia më e madhe e shtrigave në historinë e SHBA”.
“Shoqëria ime e madhe dhe unë jam duke u sulmuar nga të gjitha anët”, tha Trump në një postim në Truth Social.
Ish-presidenti Donald Trump është përfshirë në një sërë sfidash ligjore që kur një turmë mbështetësish të tij sulmuan Kapitolin e SHBA më 6 janar 2021, teksa ai do të largohej nga detyra.
Javën e kaluar, një anëtar i milicisë së Teksasit u dënua me 7 vjet burg për përfshirjen e tij në sulm.
Ndërkohë, FBI kontrolloi të hënën pasurinë e Trump në Florida, Mar-a-Lago, në një hetim të veçantë federal nëse ai mori në mënyrë të paligjshme dokumente të klasifikuara nga Shtëpia e Bardhë drejt në fund të mandatit të tij si president.
Trump dhe ligjvënësit republikanë e kanë kritikuar operacionin e FBI-së si të motivuar politikisht.
