Ushtria ruse ka përfunduar rigrupimin e saj dhe po përpiqet të identifikojë dobësitë e Forcave të Armatosura të Ukrainës për të nisur një ofensivë në shkallë të gjerë në zonën operacionale të Donetskut.
Të paktën kështu raportojnë sot mediet ukrainase, duke iu referuar një raporti të Inteligjencës.
“Armiku përfundon rigrupimin e trupave të tij. Të gjitha grupet taktike të batalioneve që janë grumbulluar deri më tani në Bjellorusi, pranë kufijve tanë veriorë, tani janë ridislokuar në Ukrainën lindore. Për më tepër, armiku tani po përpiqet të identifikojë dobësitë e Forcave të Armatosura të Ukrainës në mënyrë që të nisë një ofensivë në shkallë të gjerë dhe të përforcojë suksesin e saj, kryesisht në zonën operacionale të Donetskut.”- tha Vadym Skibitsky, përfaqësues i Drejtorisë së Përgjithshme të Inteligjencës të Ministrisë së Mbrojtjes të Ukrainës, citon Ukrinform.
Lidhur me raportet për vendimin e pretenduar të pushtuesve për të ndalur sulmin në fabrikën e çelikut Azovstal në Mariupol, përfaqësuesi i Ministrisë së Mbrojtjes tha se, sipas të dhënave të inteligjencës ushtarake, udhëheqja ruse po gënjen.
“Sipas të dhënave të Drejtorisë së Përgjithshme të Inteligjencës, udhëheqja ruse po gënjen si gjithmonë. Po, ata mund të refuzojnë të kryejnë një sulm në shkallë të gjerë në këtë objekt, por, sipas të dhënave tona, ata planifikojnë të përfshijnë Gardën Ruse dhe të tjera agjenci, përfshirë FSB-në, të vazhdojnë të sulmojnë uzinën e Azovstal për të shkatërruar rezistencën tonë.”– komentoi Skibitsky.
Të premten, zv.kryeministrja Iryna Vereshchuk u shpreh se njerëzit në Mariupol ndoshta do të jenë në gjendje të evakuohen më 23 prill.
