Presidenti Volodymyr Zelensky u bëri thirrje ukrainasve të dorëzohen, sipas një lajmi gjatë një transmetimi të drejtpërdrejtë në një kanal televiziv ukrainas të mërkurën. Kanali tha se mesazhi ishte i rremë dhe fajësoi hakerat për incidentin.
“Ju këshilloj të lini armët dhe të ktheheni te familjet tuaja. Ju nuk duhet të vdisni në këtë luftë. Unë ju këshilloj të jetoni dhe unë do të bëj të njëjtën gjë”, ishte mesazhi i supozuar i liderit ukrainas, i cili u shfaq në mes të një transmetimi të rregullt lajmesh në Ukraina 24.
Kanali lëshoi shpejt një deklaratë duke fajësuar ‘hakerët e armikut’ për kompromentimin e medias. Vetë Zelensky shpejt hodhi poshtë thirrjen e supozuar për t’u dorëzuar dhe e përshkroi incidentin si ‘një provokim fëminor’.
“Unë mund të propozoj vetëm që trupat ruse të ulin armët dhe të kthehen në shtëpi,” tha presidenti në një fjalim të shkurtër video.
“Ne jemi në shtëpi, duke mbrojtur tokën tonë, fëmijët tanë, familjet tona. Kështu që ne nuk do i dorëzojmë armët deri në fitore”, shtoi ai.
Hakerët shënjestruan disa media ruse menjëherë pasi Rusia nisi fushatën ushtarake kundër Ukrainës më 24 shkurt. Pati gjithashtu raportime për sulme kibernetike në faqet e internetit të agjencive qeveritare ruse dhe ukrainase.
