Këtë të mërkurë, Partia Socialiste do të prezantojë kandidaten për zgjedhjet e pjesshme vendore në Bashkinë e Lushnjës, Eriselda Sefa.
Drejtuesi politik i PS-së për Qarkut e Fierit dhe kreu i grupit parlamentar, Taulant Balla, në një postim në rrjetet sociale shprehet se Sefa ka nevojë për votëbesimin masiv të lushnjarëve për të vazhduar punët e nisura.
Ai u bën thirrje qytetarëve të Lushnjës që ta mbështesin kandidaten e PS-së, për të cilën shprehet se në vetëm pak javë startoi një qasje e re në administrimin e bashkisë.
“Erdhi e mirëpritur kjo fushatë e pjesshme zgjedhore në Lushnje. Them e mirëpritur sepse duhej miratimi i domosdoshëm i popullit të kësaj bashkie për ekipin që duhet të zbatojë shumë projekte dhe punë të mëdha në këtë bashki. Me Eriselda Sefa vetëm në pak javë startoi një qasje e re në administrimin e bashkisë. Eksperienca e saj prej 16 vitesh në qeverisjen vendore me fokus tek projektet me donatorët e huaj, e dhanë menjëherë efektin pozitiv, megjithë kohën e shkurtër.
Eriselda ka nevojë për votëbesimin masiv të lushnjarëve për të vazhduar punët e nisura, për të hapur kantiere të reja punësh publike dhe infrastrukturës bujqësore sëbashku me ekipin e saj. Unë kam nderin të drejtoj Partinë Socialiste në Lushnje në këtë fushatë të parë timen aty dhe e di shumë mirë se çfarë duhet të ndryshojmë dhe bëjmë më mirë që lushnjarët të na japin miratimin e tyre. Mbështetja e Kryeministrit Edi Rama dhe Qeverisë për punët e mëdha që kemi filluar dhe që do të fillojmë është në fakt çelësi dhe garancia e angazhimit tonë për të kërkuar votëbesimin dhe mbajtur fjalën e dhënë. Sot në orën 16.00, në Pallatin e Kulturës që mban emrin e një lushnjareje të madhe – Vaçe Zela, ne startojmë fushatën tonë për t’i kërkuar popullit të mrekullueshëm dhe punëtor të Lushnjes votëbesimin për Eriselda Sefa.”- shkruan Balla.
Kujtojmë se Eriselda Sefa mori detyrën e kryetares së bashkisë së Lushnjës në korrik të vitit të kaluar, pas shkarkimit të Fatos Tushes i cili akuzohet nga SPAK për korrupsion dhe shpërdorim detyre në lidhje me një tender.
