Varianti A.30 i koronavirusit, i zbuluar në Angola dhe Suedi, është shumë rezistent ndaj antitrupave që krijohen në trup nga vaksinat Pfizer dhe AstraZeneca, ka treguar një studim i ri laboratorik.
Një ekip nga Gjermania shqyrtoi variantin e rrallë A.30 që u regjistrua fillimisht në Tanzani dhe më vonë u zbulua në disa pacientë në Angola dhe Suedi këtë pranverë. Ata e krahasuan mutacionin me variantet Beta dhe Eta. Beta u zgjodh sepse ka ‘nivelin më të lartë’ të rezistencës ndaj antitrupave, thanë studiuesit.
Sipas studimit të botuar në revistën ‘Cellular & Molecular Immunology’ këtë javë, varianti A.30 tregoi aftësi të përmirësuar për të hyrë në shumicën e qelizave pritëse, duke përfshirë qelizat e veshkave, mëlçisë dhe mushkërive.
Mutacioni ‘hyn në linja të caktuara qelizore me efikasitet të shtuar dhe shmang neutralizimin e ndërmjetësuar nga antitrupat’, zbuloi studimi.
“Në përmbledhje, A.30 shfaq një preferencë të linjës qelizore që nuk vërehet për variantet e tjera virale dhe shmang në mënyrë efikase neutralizimin nga antitrupat e shkaktuar nga vaksinimi ChAdOx1 nCoV-19 [AstraZeneca] ose BNT162b2 [Pfizer].” – thuhet në studim.
Varianti rezultoi gjithashtu të jetë rezistent ndaj ilaçit monoklonal Bamlanivimab, i cili përdoret për trajtimin e Covid-19, por ishte i prekshëm nga një koktej Bamlanivimab dhe Etesevimab.
A.30 deri më tani nuk është renditur nga Organizata Botërore e Shëndetësisë (OBSH) si një variant me interes ose shqetësim, për shkak të prevalencës së tij të ulët.
