Vendosni fjalën kyçe....

Debatet në PS-në e Shkodrës/ Reagon PD: Rama, Doshi e Rakipi po ndajnë plaçkën e masakrës zgjedhore


Partia Demokratike ka reaguar lidhur me lajmet për debatet e zhvilluara në mbledhjen e Partisë Socialiste në Shkodër.

Deputeti Enkelejd Alibeaj thotë se për PD-në, ndarja e politikës nga krimi është prioritet kombëtar. Sipas tij, debatet e zhvilluar mes bazës së PS-së dhe Damian Gjiknurit e Blendi Klosit, konfirmojnë se “pushteti” nuk i përket qytetarëve, as socialistëve, por ortakëve të Edi Ramës.

 “Për Partinë Demokratike, ndarja e politikës nga krimi është një prioritet kombëtar. Prej kohësh, me fakte dhe prova, kemi paralajmëruar se si modeli i ndërtuar nga Edi Rama po përhapet si një tumor në indet e partisë që ai sundon dhe metastazat shtrihen në gjithë aparatin shtetëror.

Debatet e publikuara në media nga mbledhja e PS-së së Shkodrës, konfirmojnë se pushteti i rrëmbyer me masakrën zgjedhore në bashkëpunim me krimin, nuk i përket qytetarëve, as socialistëve, por ortakëve të Edi Ramës që blenë vota, shantazhuan, dhunuan, dhe në këmbim marrin kontrollin mbi ato institucione që i shërbejnë më mirë interesave të tyre kriminale.

Këto rrëfime janë prova më e qartë se si partneriteti i pakicës plaçkitëse Rama, Doshi, Rakipi, funksionin si një PPP korruptive dhe kriminale, në kurriz të familjeve shqiptare. Pak ditë më parë ata bashkuan mandatet e vjedhura për të konfirmuar ortakërinë e tyre parlamentare, jo për të zgjidhur çështjen e papunësisë, gjendjen e rëndë ekonomike apo korrupsionin që cënon të ardhmen e Shqipërisë, por për të nginjur babëzinë e tyre në dëm të qytetarëve. Përballja me këtë model është detyrë imperative për Partinë Demokratike dhe për shoqërinë shqiptare, sepse ç’kapja e shtetit nga krimi dhe korrupsioni janë e vetmja mënyrë për t’u dhënë fëmijëve tanë një të ardhme më të mirë.”- shprehet Alibeaj.

Ditën e sotme në medie, u zbuluan detaje nga mbledhja e strukturave të PS-së në Shkodër, ku baza e partisë ishte shprehur kundër Damian Gjiknurit e Blendi Klosit lidhur me punësimet.

Baza e PS-së pretendon se i është lënë shumë hapësirë në punësime e emërime drejtorësh kreut të PSD-së Tom Doshit.