Gjykata Speciale e Hagës ka vendosur të refuzojë kërkesën e ish-presidentit të Kosovës, Hashim Thaçit, që ky i fundit të hetohej e gjykohej në gjendje të lirë.
Gjyqtari francez paraprak ka injoruar garancinë e ofruar nga dy shtete për lirimin nga paraburgimi të ish-presidentit.
Në vendimin e tij të specifikuar, gjyqtari Guillou ka urdhëruar mbrojtjen e Thaçit që parashtresat në lidhje me rishikimin tjetër të paraburgimit t’i dërgojë deri më 31 gusht.
Paraprakisht, avokati i ish-presidentit Thaçi, Gregory Keohe, ka dërguar në Gjykatë parashtresat e tij për lirimin nga paraburgimi të ish-presidentit.
Në këto parashtresa, Keohe përveç kundër-argumentimit të fakteve të prezantuara nga Prokuroria, jep detaje edhe për garancitë e ofruara për lirimin nga paraburgimi të Thaçit.
